ضربة بن سلمان القاتلة.. سر انقلاب السعودية على الأمريكان وخطة الإطاحة بالدولار
من وقت وصول الرئيس الأمريكي جو بايدن للبيت الأبيض وجلوسه على كرسي الحكم لأكبر دولة في العالم وفيه حالة من الجفاء بتحكم العلاقة بين الولايات المتحدة الأمريكية والمملكة العربية السعودية الشقيقة.. والحقيقة ان بايدن هو اللي بدأ التصريحات المستفزة وهاجم النظام السعودي صحيح حاول يصلح بعد كده ويرجع العلاقات لما زار السعودية السنة اللى فاتت لكن زي ما بيقولوا في المثل اللى اتكسر عمره ما بيتصلح.. والنظام السعودي عمره ما هينسى اللى عمله بايدن ولأن السعودية بتعيش عصر جديد عصر مفيهوش مكان للعواطف ولا للعلاقات التاريخية والمصلحة بس هي اللى بتحكم بدأت المملكة من فترة خطة للخلاص من هيمنة الدولار خصوصا بعد ما استخدمته أمريكا كسلاح وبتفرض من خلاله عقوبات على اى دولة ما بتسمعش الكلام.. فيا ترى ايه مخطط المملكة لضرب الدولار ؟ وليه اى تحرك من السعودية في ملف العملة الأمريكية بيصير الرعب في البيت الأبيض؟ وايه دور الأمير محمد بن سلمان في المرحلة الجديدة اللى بتعيشها السعودية؟
خد بالك ان تحرك اى دولة ضد الدولار مبيفرقش اوي مع الامريكان يعنى مثلا كل اللى بتعملوا روسيا والصين في ملف العملة مش مخوف الأمريكان صحيح بيتابعوا وبيرصدوا اللى بيحصل لكن مش مكنوش قلقانين لغاية ما السعودية دخلت على الخط وباركت خطوات التخلص من نفوذ الدولار ومن سيطرة العملة الأمريكية على حركة التجارة وعلى حجم الاحتياطي النقدي في البنوك المركزية، ومن يومها والأمريكان مرعوبين من أي خطوة مفاجئة من النظام السعودي ممكن تكون المسمار الأخير في نعش الدولار
طب اشمعنا السعودية اللى أمريكا عاملالها حساب؟
لأن أمريكا بتستمد قوتها على مسرح الاقتصاد العالمي من سيطرة الدولار على حركة التجارة وده بيتم من خلال ما يعرف بمصطلح البترودولار اللى بعتمد على ان تسعير النفط ما يتمش غير بالعملة الأمريكية وفقا لاتفاقية اتوقعت بين السعودية والامريكان في سبعينيات القرن الماضي يعنى لو حضرتك اى دولة عاوزة تشترى بترول أو غاز او سولار لازم السعر يقيم بالدولار وبناء على السعر ده بيتحدد السعر العالمي للنفط وسعر البرميل عالميا وده ضمن لأمريكا رواج غير مسبوق لعملتها وخلا البنوك المركزية تسعى انها تزود احتياطياتها من الدولار عشان تشترى بيه احتياجاتها في اى وقت
وهل السعودية ممكن تتراجع عن الاتفاقية دي وتقبل تقييم سعر النفط بعملات تانية؟
ده اللى فعلا حصل ومن فترة الحكومة السعودية أعلنت انها منفتحة على بيع انتاجها من النفط بعملات تانية منها الروبل واليوان الصيني وفك الارتباط بين الدولار والنفط هيكون ضربة قوية جدا للدولار صحيح ده لسه محصلش بشكل فعلى على ارض الواقع لكن كون يتم التلويح بيه فده معناه انه ممكن يحصل في اى وقت
حد هيسأل ويقول هل السعودية خدت خطوات تانية ضد الدولار اللى أمريكا سيسته؟
السعودية خدت خطوة مهمة وخطيرة بالنسبة للامريكان بانضمامها لتحالف بريكس اللى واحد من أهدافه الرئيسية استحداث عملة عالمية جديدة بديلة للدولار بالإضافة الى تبنى نهج جديد قائم على اتفاقيات مبادلة العملات الوطنية بين الدول الأعضاء في التجمع وكل دي خطوات بتهدد مستقبل الدولار وبتؤكد قدرة السعودية مستقبلا على التخلي عن العلاقة مع الأمريكان
ولازم تكون عارف ان السعودية مؤخرا اتجهت لزيادة استثماراتها مع المعسكر الشرقي وتحديدا الصين وفيه اتجاه بيقوده ولى العهد الأمير محمد بن سلمان للتخلى عن الدولار وزيادة حصة المملكة من الاستثمارات مع دول معادية للأمريكان بشكل واضح زي روسيا وغيرها من الدول.
