نهاية نفوذ الدولار.. إيه حكاية الجنيه الجديد اللي هيطلقوا البنك المركزي؟
يا ترى ايه حكاية مؤشر الجنيه الجديد اللى بيستعد البنك المركزي لاطلاقه خلال الأيام الجاية؟ وهل هيقدر من خلاله يقضى على أزمة نقص العملة فى مصر؟ ويعنى ايه مؤشر جنيه أصلا؟ وامتى البنوك المركزية بتلجأ لمؤشر العملة ده؟
لو فاكرين من فترة طويلة كده كان القائم بأعمال محافظ البنك المركزي حسن عبدالله أعلن ان مصر بتستعد لاطلاق مؤشر الجنيه اللى بتسعى مصر لاستحداثه للمرة الأولى في تاريخها وبيستهدف قياس قيمة الجنيه مقابل سلة من العملات وعناصر تانية زي الدهب وغيره.. يعنى باختصار كده سعر الجنيه مش هيتقيم بناء على ارتباطه بالدولار بس ولكن بكتير من العملات
والمؤشر ده هيحرر الجنيه المصري من هيمنة وسيطرة الدولار الأمريكي يعنى سعر الجنيه مش هيتحدد بناء على قيمته قدام الدولار بس ولكن قدام سلة تانية من العملات زي اليورور والاسترلينيو الين اليابانى واليوان الصينيى والروبل الروسي.. وغيرهم من العملات
حد هيسأل ويقول وده هيأثر ازاى على سعر الجنيه؟
مؤشر الجنيه ده لما يتعمل هيعمل انقلاب حرفيا فى سوق صرف الجنيه المصري قدام العملات التانية، وهيخلص مصر من أزمة عويصة بتعاني منها من فترة طويلة وهي ازمة نقص العملة الأجنبية ، كمان مؤشر الجنيه هيساعد مصر انها تعمل اتفاق مبادلة عكملات وطنية مع كتير من الدولار وبدل ما بتسدد كل صادراتها بالدولار هتسدد بعملات تانية زي اليوان الصيني والروبل الروسي وده هيخفف الضغط على الاحتياطي النقدي من الدولار وكمان هيعمل توازن واستقرار فى الأسواق وهيخليك تشتري سلع بأرخص كتير من سعرها الحالى لأن اى سلعة مقومة بالدولار غير لما تكون مقومة بالروبل أو الين فرق السعر كبير جدا
ومن مميزات استحداث مؤشر الجنيه ان مصر عندها كتير من الشركاء الاقتصاديين، من بينهم الاتحاد الأوروبي اللي بيعد شريك تجاري مهم لينا بجانب الاستثمارات الأجنبية المباشرة، وبيلعب البنك الأوروبي للتعمير دور مهم لمساندة الاقتصاد المصري وبالتالي مهم نشوف تأثير اليورو على الجنيه المصري.
والبنك المركزي فكر فى مؤشر الجنيه لفك الارتباط بين العملة المصرية والدولار خصوصا ان مصر مثلا مش زي الدول المنتجة للنفط المرتبطة بشكل اساسي بالعملة الامريكية .. وخد بالك احنا أغلب احتياجاتنا بستوردها من الخارج يعنى اى مبادلة عملات مصر هتعملها مع اى عملة تانية هتفف بيها الضغط على الاحتياطي ومعاها هتقل فاتورة الاستيراد بشكل واضح
