ضربة المركزي المنتظرة بعد بريكس.. زلزال هيهز الأسواق

 
ياترى ايه اللى هيحصل بعد انضمام مصر لمجموعة بريكس؟ وايه الحاجة المهمة اللى بيحضرلها البنك المركزي وهتعمل انقلاب في الأسواق؟ وايه موقف تعويم الجنيه هل كده خلاص مفيش تعويم ولا ممكن يكون فيه تخفيض جديد لسعر العملة المصرية؟ وامتى السوق السودا للدولار تختفي؟ وهل مصر كده عدت من الأزمة الاقتصادية الصعبة اللى بنعيشها بقالنا حوالى سنتين؟ 
 

من يوم الخميس وكل الناس بتسأل يا ترى ايه اللى هيحصل بعد انضمام مصر لمجموعة بريكس وايه الفوايد اللى هتعود علينا من الانضمام لتحالف كبير زي ده؟ وهل مصر هتكتفى بس لكده لا فيه إجراءات تانية بتحصل في الكواليس نهاء أزمة نقص العملة الأجنبية اللى بتعاني منها مصر من مارس 2022 ولحد دلوقتي؟  

مؤشر الجنيه المصري

كلنا عارفين الوضع الصعب للجنيه المصري والتراجع الكبير اللى حصل في قيمته فى السنة الأخيرة وإزاي انخفض بأكتر من 100% وانعكاس ده على الأسعار فى الأسواق، وكمان تأثيره على ميزانية الأسر المصرية، ومن هنا البنك المركزي بدأ يفكر فى حلول من خارج الصندوق يقدر من خلالها يعزز مكانة الجنيه ويوقف جنون الدولار.. ووقتها ظهرت فكرة مؤشر الجنيه المصري اللى بتسعى مصر لاستحداثه للمرة الأولى في تاريخها وبيستهدف قياس قيمة الجنيه مقابل سلة من العملات وعناصر تانية زي الدهب وغيره.
والمؤشر ده هيحرر الجنيه المصري من هيمنة وسيطرة الدولار الأمريكي يعنى سعر الجنيه مش هيتحدد بناء على قيمته قدام الدولار بس ولكن قدام سلة تانية من العملات زي الين اليابانى واليوان الصينيى والروبل الروسي.

موعد إطلاق مؤشر الجنيه المصري

طب الكلام ده معناه ايه ؟ وهل ممكن يغير الوضع الصعب للعملة المصرية؟
مؤشر الجنيه ده لما يتعمل هيعمل انقلاب حرفيا فى سوق صرف الجنيه المصري قدام العملات التانية، وكانت روسيا أعلنت من فترة عن خطوة مهمة باعتماد الجنيه ضمن قايمة العملات اللى هيتم التعامل بيها قدام الروبل الروسي
وخلونا نشرح الموضوع اكتر لحضراتكم دلوقتى مصر لو عاوزة تستورد قمح مثلا أو بترول فهي مضطرة تدفع المقابل بالدولار فايه اللى بيحصل كل ما فاتورة استيرادك بتزيد كل ما الضغط على الدولار والطلب عليه بيزيد وده بيخلى العملة الأمريكية سعرها يرفع كل شوية فدلوقتى تقدر تروح تجيب قمح ومواد بترولية من روسيا وهتدفع بالروبل فمنها انت خففت الضغط على الاحتياطي بتاعك من العملة الصعبة ومنها انك هتشترى الحاجات دي بسعر أقل نتيجة فرق العملة العكبير بين الدولار والروبل وكفاية تعرف ان سعر الروبل الروسي حوالى 43 قرش. 
مصر كمان شغالة مؤخرا على مشروع كبير لمبادلة العملة المصرية مع عدد من الدول العربية زي السعودية والامارات وقطر وغيرهم

والمبادلة دي هتتم إزاي؟
هقولك.. مثلا مصر عاوزة من السعودية بترول والسعودية عاوزة من مصر مواد غذائية مصر هتسدد تمن البترول بالريال السعودية والسعودية هتدفعلك بالجنيه المصري وده زي ما قلنا هيقلل فاتورة استيرادك الدولارية وهيرفع من قيمة الجنيه ومعاه سعر الدولار فى مصر هينزل.

أهمية مؤشر الجنيه

وأهمية مؤشر الجنيه ده ان مصر عندها كتير من الشركاء الاقتصاديين، من بينهم الاتحاد الأوروبي اللي بيعد شريك تجاري مهم لينا بجانب الاستثمارات الأجنبية المباشرة، وبيلعب البنك الأوروبي للتعمير دور مهم لمساندة الاقتصاد المصري وبالتالي مهم نشوف تأثير اليورو على الجنيه المصري.
وكتير من الخبراء كانوا بيطالبوا من زمان بفك الارتباط بين الجنيه والدولار خصوصا ان مصر مثلا مش زي الدول المنتجة للنفط المرتبطة بشكل اساسي بالعملة الامريكية .. وخد بالك احنا أغلب احتياجاتنا بستوردها من الخارج يعنى اى مبادلة عملات مصر هتعملها مع اى عملة تانية هتفف بيها الضغط على الاحتياطي ومعاها هتقل فاتورة الاستيراد بشكل واضح 
ومؤشر الجنيه هيكون أداة للتحوط وهيسبب نوع من الاستقرار في سوق الصرف لأننا مش هنقيس قوة الجنيه قدام عملة واحدة 
وخد بالك ان مش بس مؤشر الجنيه اللى بيفكر فيه البنك المركزي لا ده فيه خطط للسماح بمشتقات جديدة للعملة من أجل إطلاق العنان للسيولة في السوق المحلية وإتاحة الأدوات للتحوط ضد الأخطار اللى بيتعرض ليها الجنيه بعد ما هبط لمستوى قياسي.
وبموجب الخطة هتوفر البنوك المحلية عقود محلية للجنيه غير قابلة للتسليم بتسمى "ان دي اف"، بالاضافة لخيارات تانية هتسمح للشركات والمستثمرين لأول مرة بالمراهنة أو التحوط ضد التقلبات في العملة المصرية، والخطوة دي بتهدف إلى بناء سوق محلية أكثر شفافية ذات مصداقية لبناء التوقعات في شأن تحركات العملة.
والبنك المركزي بيطبق منهجية واضحة من بداية تنفيذ برنامج الإصلاح الاقتصادي فى 2016 مبنية فى الاساس على استهداف مستوى معلن للتضخم بهدف ترسيخ مبدأ الشفافية في سياسات كبح جماح الأسعار والسيطرة عليها بالتنسيق الكامل مع الحكومة.