الملف السري وراء انضمام مصر للبريكس.. خطة الرئيس للسيطرة على المنطقة

تصدق أو تفتكره مبالغ فيه لكن مصر خلاص قوة اقتصادية عالمية قادمة وعندها فرص ومقومات تخليها الأهم في الشرق الأوسط وأفريقيا.. ايه اللي حصل وليه مصر هتتحول لمارد اقتصادي وإيه هي الفرص اللي هتخلي مصر في حتة تانية وإيه حكاية الملف السري لللي مصر دخلت عشانه التجمع الدولي الضخم.
ناس كتير فاكرة إن الانضمام للبريكس كان طوق نجاة لمصر، ودا مش حقيقي بالمرة لأن لو مصر بتغرق مكانتش المجموعة قبلت طلبها ولا رحبت بيه من أصله زي ماحصل مع الجزائر و 22 دولة تانية تقدمت للانضمام للبريكس واتقالها متأسفين مش هنقدر نقبلكم عشان عندكم مشكلات.

لكن موافقة قادة بريكس على انضمام مصر للتكتل الضخم هو بمثابة إضافة عظيمة للبريكس نفسه ومش العكس لأن دول البريكس مصر بالنسبة لهم كنز هيسوق تجارة المجموعة كلها والطريق للسيطرة على افريقيا باعتبار مصر القوة الضاربة الصناعية في القارة السمراء بجانب قوتها السياسية والعسكرية والثقافية والبشرية والحضارية ودي ميزات مش موجودة أو مجتمعة في دولة واحدة زي مصر بالأضافة إلى تنوع فرص مصر وتنوع اقتصادها واعتماده على  أكتر من شريان فمصر بلد سياحي بينمو بسرعة الصاروخ وعندها أحدث بنية تحتية في العالم ومواني وطرق ولوجستيات وممرات تجارية وتسويق وسوق بشري كبير.

نرجع لموضوعنا لما مصر تقدر تنطلق اقتصاديا بفعل تنوع اقتصادها وخلي أزمة الدولار على جمب عشان أزمة وهتعدي وحتى لو مصر مدحلتش البريكس ايه خلاها تصر على دخول التكتل العملاق.. شوف حضرتك هنا كلمة السر مصر دحلت ليه البريكس.. لو بصينا على الدول المؤسسين للبريكس هنعرف ببساطة ليه مصر عملت كده وببساطة الملف التكنولوجي هو الدافع المصري الأساسي للانضمام للبريكس بجانب طبعا تخفيف الاعتماد على الدولار الأمريكي في المعاملات التجارية واستفادة مصر من السوق المخيف للبريكس واللي بيعدي ال3 مليار بني أدم وغيرها وغيرها من المميزات لكن يفضل ملف التكنولوجيا المتقدمة في الصين والهند وروسيا هو الهدف الأساسي اللي مصر بتسعى إلى تعاون كبير فيه وشراكات وتصنيع مشترك بشكل أسهل لو كانت خارج البريكس، وأكيد عضوية مصر هتسهل مشاركة الدول الأعضاء للتكنولوجيا المتقدمة مع مصر في ضوء اتفاقيات لتبادل الخبرات والنهوض بالبريكس كمجموعة واحدة ودا بيشمل تأهيل كل الدول الأعضاء على المنافسة ككتلة واحدة للكيانات الخارج البريكس وأكيد ملف التكنولوجيا هيكون محل تعاون وتبادل معلومات وصناعات مهم جدا ضمن أهداف البريكس لأعضائها.

مصر طبيعي عندها بنية أساسية وصناعات تكنولوجية لكن ماعند الصين والهند أعظم ومصر في حاجة لتوطين مزيد من التكنولوجيا المتقدمة والذكاء الاصطناعي وتكنولوجيا الفضاء وغيرها، والملف دا كفيل إنه يفرض سيطرة مصر على المنطقة بأكملها لأن مصر عندها علماء نابغين في كل بلاد العالم وتوطين صناعة تكنولوجيا متقدمة في مصر كفيل إن ينقل الصناعات المصرية لنادي الكبار.