ضربة للدولار وصدمة لصندوق النقد.. إيه اللى هيحصل بعد انضمام مصر لبريكس؟

يا ترى إيه اللى هيحصل بعد انضمام مصر رسميا لعضوية تجمع بريكس؟ وايه المكاسب اللى هتعود علينا ؟ ومين الدول والجهات المتضررة؟ وايه تأثير ده على الأزمة الاقتصادية الكبيرة اللى بناعنى منها؟ وهل ممكن ده يساهم في حل أزمة ارتفاع أسعار القمح والحبوب؟ وامتى نتايج الانضمام لبريكس ممكن تظهر؟

النهاردة  مجموعة "بريكس" قررت فى اجتماعها السنوى اللى بتستضيغه جنوب افريقيا زيادة عدد أعضائها، وأعلنت الموافقة على انضمام مصر ومعاها كمان مجموعة تانية من الدول زي السعودية والإمارات والأرجنتين وإيران وإثيوبيا إلى الانضمام.. وده تحرك هيحوّل المجموعة إلى تكتل يسيطر على ما يقرب من تلت الاقتصاد العالمي.
ناس كتير ما تعرفش ايه تأثير الخطوة دي على مصر ولا ايه تداعياتها الايجابية الكبيرة على الاقتصاد.. وخلونا نقول لحضراتكم ان وجود مصر في تجمع البريكس، بيديها تقل وأهمية كبيرة وبيأكد دورها المهم والمحوري فى الشرق الوسط خصوصا انها من أوائل الدول اللى تم الموافقة على انضمامها لبريكس بعد الدول المؤسسة ولازم نكون عارفين ان فيه اكتر من 23 دولة قدمت للانضمام لبريكس واتوافق على 6 بس كان أولهم مصر.

وسعت كتير من الدول للانضمام لتجمع بريكس خلال الفترة اللى فاتت للاستفادة من مميزات الانضمام للتجمع وهتنعكس عضوية مصر فى بريكس من خلال  الاستفادة من تطوير علاقاتها مع دول باقي التجمع بشكل أفضل، من حيث التفضيل في المعاملات التجارية وتطوير نظام المدفوعات وكمان الاعتماد على العملات المحلية للدول وده هيخفف الضغط على عملات تانية أهمها طبعا الدولار اللى مصر بتعاني من أزمة فيه من مارس 2022 ولحد دلوقتي.

وبتمثل دول مجموعة بريكس حوالي 40% من مساحة العالم وبيعيش فيها أكتر من 40% سكانه ووصلت مساهمة المجموعة إلى 31.5% من الاقتصاد العالمي يعنى مصر حرفيا هتقدر تتعامل مع تلت الاقتصاد العالمي بالعملات الوطنية لبريكس ومش هتكون محتاجة الدولار فى حاجة

وخد بالك ان مصر مثلا بستورد اغلب احتياجاتها من القمح من دولة زي روسيا وكمان الهند بنجيب منها قمح ورز ومنتجات تانية كتير وطبعا الصين حدث ولا حرج احنا بنعتمد على جزء كبير جدا من صادراتنا على الين وال 3 دول دول أعضاء بارزين فى بريكس فكل تعاملاتنا التجارية معاهم هتكون بالعملات المحلية

ومن الفوايد المهمة لانضمام مصر لبريكس انها ممكن تتخلى عن صندوق النقد الدولى وما تاخدش قروض منه تانى لأن بريكس عندها كيان موازي وهو بنك التنمية الجديد اللى يعتبر بديل للصندوق وبيقرض دول بريكس لكن بفايدة أقل بكتير ومن غير شروط تعجيزية زي صندوق النقد