مصر رايحة على فين بعد البريكس.. مفاجآت العملاق الجديد

النهاردة مصر كان اسمها بيلف كل العالم بعد قرار البريكس ضم مصر رسميا وكعضو دائم بمجموعة بريكس العملاقة.. وبمجرد الإعلان اطرحت اسئلة كتير.. إيه اللي هيحصل يعني لما مصر تنضم للبريكس وإزاي المنطقة ممكن تتغير والأهم ايه اللي هيعود على المواطن المصري من البريكس وهل مصر ممكن تتعاقب من أمريكا وأوروبا على الخطوة دي.

من واحد يناير 2024 شكل المنطقة هيتغير، وهيحصل انقلاب في حركة التجارة والتعاملات التجارية وأسواق صرف العملة، ونهاية الدولار ومعاه نهاية أزمة استمرت شهور طويلة، وتعالوا نفكركم باللي حاصل على الارض  عشان نعرف بكرة فيه إيه .
مصر ليها شهور بتعاني من أزمة نقص دولار حاد ودا كان سبب معاناة كل المصريين مع ارتفاع الاسعار والغلاء الفاحش  واحتكار التجار وحبس السلع واللي حول حياة كتير مننا لواقع صعب، ورغم إن الحكومة كانت بتسابف الزمن عشان الأمور ماتخرجش عن السيطرة وتلجم الدولار لكن فضلت الامور صعبة، ولغاية الحكومة ما فكرت في حلول بره الصندوق عشان تخرج من أزمتها وكانت البداية بمبادرة سيارات المصريين بالخارج والسماح بدخول الدهب مع المغتربين من غير جمارك وطرح شهادات دولارية واراض وغيرها من المبادرات لجذب الدولار.
لكن كان الحل الأهم لأزمة الدولار قدام الحكومة هو البحث عن بديل للدولار في العالم وهنا مصر فكرت في البريكس كمجموعة دول مصر بتستورد منهم بأكتر من 25 مليار دولار في السنة، ودا غير المزايا التمويلية للبريكس والتبادل التجاري المشترك والتعاون في كل المجالات، والحقيقة نقدر نقول البريكس جت في وقتها، حتى لو مكانتش مصر عندها أزمة عملة لان من حق كل دولة تنوع اقتصادها وتعاونها مع الكيانات الاقتصادية الدولية، وعشان كده لا أمريكا اعترضت ولا أوربا احتجت لأن مصر دولة حرة بتدور على مصالح شعبها .
طيب نرجع لسؤالنا هو المواطن هيستفيد ايه من بريكس.. شوف حضرتك بريكس المفروض هتحل أزمة كبيرة في سوق الدولار، ولأن الدولار عملة تداول في النهاية مهما  كانت قوتها، فسعرها بيخضع للعرض والطلب وعشان فيه نقص في المعروض منها سعرها رفع وظهرت السوق السودا والعكس صحيح لما تتوفر سعرها هينزل قصاد الجنيه في سوق الصرف، ومصر بتستورد بحوالي 25 مليار دولار وحجم تبادل 32 مليار دولار مع دول البريكس في العادي ولما يتم استبدال الدولار بالعملات الوطنية يبقي مصر هتوفر المبلغ الكبير دا ودا معناه ببساطة نزول سعر الدولار وبالتالي انحفاض أسعار السلع بشكل كبير لأنها بيتم استيرادها بالدولار وزاد سعرها لما الدولار سعره رفع.
طبعا من يناير اللي جاي شكل المنطقة هيتغير زي ماقلنا وهتبقى مصر عضو دائم في تحالف ضخم وكيان هائل وسوق متسع وفرص ملهاش حدود، وهتلاقي نفسها بتنافس جوه المجموعة وهتستثمر كل طاقاتها في النمو والصعود ومصر هتبقى في حتة تانية لأنها هتنضم لكيان بيسابق الزمن ومفيش وقت فيه للأزامات والتراخي.