خطاب الـ 17 دقيقة ينهي زمن هيمنة الدولار.. إيه اللي هيحصل الأيام الجاية؟
كل الأوساط الاقتصادية فى العالم بتتابع فى الساعات الأخيرة بقلق وترقب اجتماع دول البريكس اللى بتستضيفه دولة جنوب افريقيا أحد الدول الأعضاء فى التجمع واللى بيناقش لأول مرة خطوات على الأرض لانهاء هيمنة الدولار على حركة التجارة العالمية وعلى حجم الاحتياطيات النقدية فى البنوك المركزية.. ونتايج الاجتاماع ده هيكون ليها تاثير كبير جدا على شكل الاقتصاد العالمي الفترة الجاية.. فيا ترى ايه اللى حصل فى كواليس اجتماع بريكس؟ وايه الخطوات اللى هيتم اتخاذها الفترة الجاية؟
امبارح بدأت فى العاصمة الجنوب افريقية فاعليات المؤتمر السنوي لتكتل بريكس اللى بيضم فى عضويته روسيا والصين والهند والبرازيل وجنوب افريقيا، بمشاركة قوية جدا من زعماء وقادة عدة دول لبحث عدد من الملفات المهمة على رأسها مناقشة انضمام دول جديدة للتجمع وتوسيع أنشطته وتواجده فى كتير من القارات بعد ما طلبت أكتر من 40 دولة الانضمام لبريكس والاستفادة من القدرات الاقتصادية والسياسية للتجمع، بالاضافة كمان لمناقشة استحداث عملة عالمية بديلة للدولار بعد ما الولايات المتحدة الأمريكية استخدمت عملتها كسلاح من بعد الحرب الروسية الاوكرانية وازاى قدرت تتلاعب بكل عملات العالم بما فيها العملات الكبيرة زي اليورو والجنيه الاسترليني وغيرهم من العملات.
ونظرا للظروف السياسية اللى بتعيشها روسيا ما قدرش الرئيس الروسي فلاديمير بوتين يحضر اجتماع بريكس لكنه ما فوتش الفرصة وبعت خطاب مسجل مدته 17 دقيقة استغله لكشف مخططات الولايات المتحدة والاعيبها القذرة واستخدامها الدولار كسلاح فى حربها الباردة ضد روسيا وازاى جمدت أرصدة واصول بمليارات الدولارات لدولة كبيرة وذات سيادة زي روسيا، وخطورة ده مستقبلا لأن امريكا ممكن تعمل كده مع اى دولة تختلف معاها.
بوتين انتقد العقوبات الغربية ضد روسيا بسبب حرب أوكرانيا وقال إن القيود التجارية المفروضة على روسيا ترقى لممارسة عقوبات غير مشروعة وتجميد غير قانوني لأصول دول ذات سيادة، وهو ما يخالف جميع المعايير والقواعد الأساسية للتجارة الحرة".
وفى خطابه روج بوتين لإزالة الدولرة وجدد دعوته لزيادة استخدام العملات المحلية للتجارة.. وقال إن التخلي عن الدولار كعملة عالمية عملية لا رجعة فيها، وأن دول مجموعة البريكس هتناقش مجموعة كاملة من القضايا المتعلقة بالانتقال إلى العملات الوطنية في جميع مجالات التعاون الاقتصادي .
الرئيس الروسي قال إن أيام هيمنة الدولار الأمريكي على التجارة بين دول البريكس معدودة وإن الأعضاء هيناقشوا تحويل التجارة بعيدًا عن الدولار إلى العملات الوطنية، وهيلعب بنك التنمية الجديد التابع لمجموعة البريكس دور رئيسي فى عمليات التخلي عن العملة الأمريكية.
