أسرار تذاع لأول مرة عن أزمة العملة.. لغز "المليار دولار" اللي ظبطتها الأجهزة الأمنية

لو حضراتكم ملاحظين في نهج مختلف بتتعامل بيه الدولة مع السوق السودا للدولار في الفترة الأخيرة.. نهج مش بيعتمد بس على التحركات اللى بيقودها البنك المركزي وبيحاول من خلالها القضاء على السوق الموازية للعملة لكن كمان دخل على الخط أجهزة أمنية على أعلى مستوى رصدت خلال الشهور الأخيرة تحركات مريبة في ملف أزمة نقص العملة.. فيا ترى ايه اللى هيحصل ؟ وايه حكاية المليار دولار اللى نجحت الأجهزة في ضبطها؟ وهل هيتم الإعلان عن عمليات ضبط جديدة الأيام الجاية؟
 
اوعا تكون فاكر ان أزمة نقص العملة اللى بتعانى منها مصر من مارس 2022 ولحد دلوقتى أزمة اقتصادية بس .. لأ دي أزمة أمن قومي وليها تداعيات خطيرة على حياة الناس في مصر.. وتخيل حضرتك الحاجة اللى كنت بتشتريها ب 100 جنيه بسبب أزمة الدولار وصلت ل 300 و 400 جنيه يعنى بالبلدي كده أي ارتفاع في سعر العملة الأمريكية بسبب اللى بيحصل في السوق السودا للصرف بيأثر عليك وعليا وعلى كل المصريين وعشان كده التعامل في الملف ده ما بقاش مع البنك المركزي بس لا فيه جهات رقابية وأجهزة أمنية علىأعلى مستوى بتتابع وبترصد كل اللى بيحصل في السوق السوداء وبدأت خطوات فعلية لوضع نهاية للظاهرة دي وفى الشهور اللى فاتت تم رصد تحركات واتصالات لتجار العملة داخل وخارج مصر واتمكنت الأجهزة المعنية من ضبط ما يقرب من مليار دولار كان بيتم تداولها بعيدا عن القنوات الشرعية داخل القطاع المصرفي ودي معلومات حصرية حصلنا عليها من مصادر مسئولة ولسه هيتم الإعلان عنها في الأيام الجاية وهيتم الإعلان كمان عن عمليات رصد وضبط لتداول النقد الأجنبي في السوق الموازية. 
والأجهزة شغالة على الأرض وكمان على صفحات السوشيال ميديا اللى بتروج لتجارة العملة وزي ما احانا عارفين فالقانون بيحظر بيع او تداول العملات الأجنبية بعيدا عن البنوك وشركات الصرافة المعتمدة والمرخص ليها بالعمل من البنك المركزي
والحرب مع تجار العملة مش بس داخل مصر لأن زي ما احنا عارفين بقا فيه عصابات للدولار منتشرة في الدول العربية وتحديدا دول الخليج اللى فيها جاليات مصرية كبيرة والعصابات دي بتشترى الدولار من المصريين هناك بأعلى سعر وتستلمه بره مصر وتسلم سعره لأهل المسافر هنا بالجنيه في محاولة منهم لضرب الاقتصاد وحرمان مصر من مورد دولاري مهم في توقيت صعب جدا.  
وبعيد عن تحركات الجهزة المنية في ملف الدولار فيه تحركات مهمة وكبيرة بيقوم بيها البنك المركزي للقضاء على السوق السوداء وآخرها الاستعدادات لإطلاق مؤشر الجنيه وللى ما يعرفش ده مؤشر كان اعلن عنه محافظ البنك المركزي من فترة طويلة ومن خلاله هيتم تقييم الجنيه المصري بناء على عدد كبير من العملات والمعادن بعيدا عن الدولار يعنى بالبلدي كده سعر الجنيه مش هيتحدد بس على الدولار وخطوة زي دي هتقلل من ارتفاعات الدولار وهتوقف جنون العملة الأمريكية في السوق السودا وده بالإضافة كمان لاتفاقيات مبادلة عملات مصر هتبرمها مع كتير من الدول ومنهم روسيا والهند وبعض الدول العربية زي السعودية والامارات