ليلة سوداء من قرن الخروب في السوق السودا للدولار
الدولار بيلم سطوته وقوته وغطرسته وراجع بلده.. خلاص أيام التحكم في مصير العالم انتهت ولك يوم يادولار.. النهاردة أكتر من نص الكرة الأرضية بتجتمع عشان إعلان شهادة وفاة العملة الأمريكية، والاستغناء عنها بعد سنين طويلة من التحكم في خطوط التجارة والمال والاقراض والتمويل والمنح والعقوبات.
بريكس النهاردة بتتفق على نظام عالمي جديد مفيش مكان فيه للدولار بين الدول الاعضاء، ومصر من ناحيته قررت التعامل بالجنيه المصري مع روسيا بشكل رسمي وكلها أيام وتنضم للبريكس هي كمان وبكده هيدخل الدولار في ركود طويل الأجل وإن زمن الأزمة اوشك إنه ينتهي.
موافقة روسيا الأخيرة على التبادل التجاري مع مصر بالروبل والجنيه وتوفير مليارات الدولارات ومعاها الحملة العالمية للاستغناء عن الوحش الأخضر نزل زي الصاعقة على تجار السوق السودا للدولار في مصر والمضاربين والكيانات اللي ساعدتهم وصدمتهم إن زمن الدولار رايح ومش جاي ونص العالم هيستغنى عنه ومن ساعتها السوق السودا بيضربوا أسداس في أخماس ومش عارفين يتصرفوا إزاي في الدولارات اللي معاهم والخسارة اللي هتيعرضولها لو فضلوا محتفظين بالدولارات اللي اشتروها بالغالي.
