طيارة الوزير هربت الدهب والدولارات.. فضيحة إعلام الفتنة

الطيارة بتاعة وزير.. رجال الأعمال بيهربوا الدولاارات.. دي عليها 5 طن دهب.. الحكومة بتهرب.. شايفين المسئولين إزاي بيهربوا الدولار والدهب.. من امبارح بالليل صحفات  الإخوان ومواقع التواصل الاحتماعي بتاعتهم نازلة ردح في قصة طيارة زامبيا وهات ياهبد وتأليف وماصدقوا جنازة يشبعو فيها لطم لكن نقبهم جي على شونة وطلع مفيش ميت أساسا في الجنازة.. ايه قصة الطيارة وايه حكاية الدهب والدولارات اللي عليها.

الساعة السابعة مساء الإتنين بالتوقيت المحلي في مطار كينيث كاوندا الدولي في لوساكا الزامبي، نزلت طيارة خفيفة وخاصة في المطار وحصل تفتيش ليها هي وطيارة تانية كانت في المطار ولاقو فيها دهب ودولارات ومخدرات وأسلحة .

الرواية الرسمية للسلطات الزامبية، قالت إنه تم احتجاز طيارة خاصة فيها 5.6 مليون دولار نقدا و602 عملة دهبية وزنها اكتر من 120 كيلو، وخمس بنادق بها 126 رصاصة، واحتجزت اللجنة 10 أشخاص، بينهم مواطن زامبي وستة مصريين وهولندي وإسباني ومواطن من لاتفيا، على ذمة التحقيق.

وبعد الإعلان بثواني قنوات فضائية معروفة من زمان سياستها ضد مصر خدت الموضوع وعملت منه حدوتة وفيلم وبعدين صحيت مواقع الإخوان وهات ياتحليل والطيارة جاية منين ورايحة فين والدهب اللي عليها والدولارات وهات ياتأليف وأكاذيب وافترا من غير مايستنوا نتيجة التحقيق، وطلعوا اشاعات إن الطيارة بتاعة وزير هو اللي بيهرب الدولارات والدهب وبعدين قالك بتاعة رجل أعمال شهير ونزلو صورته جمب الطيارة وشير الصورة والناس صدقت ومخدتش بالها إن الصورة متفبركة.
الصدمة كانت شديدة للإخوان ولفضائيات الفتنة إياها، لما جت نتائج التحقيق من مسئولي زامبيا ولما قالوا إن تحليل الدهب المضبوط أكد إنه مغشوش ومش دهب ولسه هيفحصوا لدولارات يشوفوها حقيقية ولا مزيفة ، ومسئولي المطار الزامبي قالوا المعلومة الأخطر وهي إن الطيارة عدت على مصر ترانزيت عشان تمون وقود وكملت رحلتها لزامبيا.

وعشان الناس مش عارفة قوانين المطارات في العالم إن أي طيارة بتنزل ترانزيت عشان تتزود بالوقود أو لعطل واستكمال رحلتها الأصلية سلطات المطار اللي نزلت فيه مش من حقهم يفتشوا الطيارة إلا لو فيه بلاغ دولي إن الطيارة عليها ممنوعات أو إرهابيين أو مطلوبين وغير كده الطيارة بتمون وتطير تاني لوجهتها الأصلية .. طيب هتقولي ليه الطيارة مش بتتفتش لما تنزل ترانزيت.. هقول لحضرتك لأنها بتكون عدت من كل إجراءات التفتيش من مطار الإقلاع وطالما مفيش شحن وتفريغ في مطار الترانزيت يبقي مش من حقك تفتشها.
طبعا الذباب الالكتروني للإخوان مخدش باله إن الطيارة مش مصرية ولا طلعت من مطار القاهرة من الأصل ولا عارفين الفرق بين مطار الإقلاع والترانزيت وكل اللي عارفينه أي حدث ويسخروه لتشويه الدولة المصرية.