حدث ضخم هيقلب الموازين.. إيه اللي هيحصل يوم 22 أغسطس؟

يا ترى ايه الحدث اللى هيحصل يوم 22 أغسطس والعالم كله مستنيه؟ وايه تأثير الحدث ده على أزمة الدولار في مصر؟ وليه المخابرات الأمريكية بنفسها بتراقب وتتابع تحضيرات اليوم ده؟ ومين الدول اللى هتستفيد من اللى هيحصل؟ ومين الدول اللى بتسعى بكل قوة لافساد ترتيبات اليوم ده؟ 
 
يوم 22 أغسطس هتستضيف العاصمة الجنوب افريقية جوهانسبرج اجتماع في غاية الأهمية والخطورة.. اجتماع النتايج اللى هتترتب عليه هتعمل انقلاب حرفيا في موازين القوى في العالم وهتغير كتير من قواعد اللعب في دنيا الاقتصاد.. وبدون مبالغة لو نجح الاجتماع ده تقدر تقول انه أول مسمار هيدق في نعش الدولار وأول خطوة حقيقية لانهاء هيمنة العملة الأمريكية على التجارة العالمية
والاجتماع اللى بنقول لحضراتكم عليه هو اجتماع مجموعة او تكتل بريكس اللى بيضم لغاية دلوقتى 5 دول رئيسية هي الصين وروسيا وجنوب افريقيا والهند والبرازيل وبيعتبر واحد من أهم وأكبر التجمعات السياسية والاقتصادية اللى هيكون ليه نفوذ كبير على المسرح العالمي خلال السنين الجاية.

طب ليه الاجتماع ده مهم وخطير؟ 
اجتماع 22 أغسطس بيكتب أهميته من أكتر من حاجة أولها ان الاجتماع هيناقش لأول مرة طلبات مقدمة للتجمع من أكتر من 15 دولة للانضمام الى بريكس والدول دي منها أسماء كبيرة وعملاقة في منطقة الشرق الأوسط والعالم زي مصر والسعودية والامارات ودول تانية كتير عندها رغبة في عضوية بريكس والاستفادة من الخدمات اللى هيقدمها التجمع لأعضاؤه مستقبلا 
كمان في الاجتماع ده هتبحث الدول الأعضاء ومن بينهم روسيا والصين طبعا مشروع كبير لاستحداث عملة عالمية جديدة بديلة للدولار تكون مكون رئيسي في الاحتياطي النقدي للدول وكمان يكون ليها حصة كبيرة في حركة التجارة العالمية ومشروع زي ده لو خرج للنور فدي هتكون ضربة قاتلة للعملة الأمريكية الدولار اللى بقالها عقود مسيطرة ومهيمنة على مكونات الاحتياطي النقدي من العملات الأجنبية في معظم البنوك المركزية حوالين العالم وكمان هي أكبر عملة بيتم الاعتماد عليها في التجارة العالمية وده واضح جدا وبصورة أكبر في تجارة النفط في العالم كله.
وعشان كده المخابرات الأمريكية بنفسها بتراقب وبتحاول تعرف ايه اللى هيحصل في اجتماع بريكس ومن خلال علاقات واشنطن الممتدة مع كتير من الدول بتحاول تستخدم نفوذها عشان تبوظ اى خطط لاستحداث عملة عالمية جديدة لأن ظهور عملة زي كده معناه على المدى البعيد زوال هيمنة الأمريكان اللى بيستمدوا قوتهم من قوة الدولار وكلنا شفنا بعد الحرب الروسية الأوكرانية ازاى الدولار طاح في كل العملات حتى العملات الكبيرة زي اليورو والاسترليني وغيرهم، ويمكن ده اللى مخلى فيه ترحيب حتى من دول اوربية بالتحركات اللى بتعملها بريكس 
طب هل اللى هيحصل يوم 22 أغسطس هيكون ليه تأثير على مصر؟ 
طبعا هيكون ليه تاثير كبير خصوصا في ظل أزمة نقص العملة لأجنبية اللى بتعانى منها مصر لأن ظهور عملة عالمية جديدة هيقلل من الضغط على الاحتياطي النقدي وهيخلى الجنيه سعره يزيد في مواجهة الدولار بالإضافة كمان ان مصر لو انضمت لبريكس هتستفاد من القدرات الاقتصادية الكبيرة للتجمع الكبير ده واللى ليه قوة اقتصادية كبيرة جدا خصوصا في مجال الحبوب اللى مصر بتنفق جزء كبير من فاتورة استيرادها عليه يعنى من الآخر كده لو مصر اضمت لبريكس والتكتل استحدث عملة عالمية جديدة فاحنا هنا بنتكلم على تغير جذري في عالم الاقتصاد وفى العلاقات التجارية لمصر.