سر الجلسة الأخيرة.. هل حسم الرئيس اسم محافظ البنك المركزي الجديد
هل حسن عبد الله محافظ البنك المركزى هيطلعله قرار تعيين جديد بمدة كاملة بعد الاستعانة بيه لإنقاذ الوضع والأسواق المالية من سنة ولا هتكون فيه مفاجآت وهل الرئيس السيسي حسم اسم المحافظ الجديد ايا كان اسمه وسر الجلسة الأخيرة مع مدبولي ومحافظ المركزي.
معروف إن المدة القانونية المصرفي المخضرم حسن عبد الله خلاص هتنتهي في الشهر دا بعد تعيينه لمدة عام محافظا للبنك المركزي واللي تمت الاستعانة بيه في ظروف قاسية وصعبة ووسط أزمة مالية عاصفة بسبب الحرب الروسية الأوكرانية عشان ينقذ الموقف ويسيطر على سوق الصرف ويحط أجندة للخروج من الأزمة في اقرب وقت.
ولأن المدة هتنتهي خلاص في أغسطس فطبيعي يكون فيه اسم جديد لشغل المنصب المالي الحساس والأهم في مصر والشرق الأوسط وهو منصب محافظ البنك المركزي المصري وطبيعي يكون الرئيس السيسي حسم كعادته في الملفات الحساسة في الوقت المناسب وسمى محافظ البنك المركزي المصري سواء بتعيين المصرفي المخضرم حسن عبد الله في ولاية جديدة كاملة أو اختيار اسم جديد.
في الساعات الأخيرة اجتمع الرئيس السيسي مع الدكتور مصطفى مدبولي رئيس الحكومة والمصرفي حسن عبد الله محافظ البنك المركزي الحالي وهالة السعيد وزيرة التخطيط ومستشار الوزير المالي، والاجتماع بحث كل جوانب الوضع المالي وأسواق الصرف والدولار وخطوات الدولة اللي جاية وخطط البنك المركزي المصري واللي بيعتبر من أهم الاجتماعات الرسمية بخصوص أسواق المال ومستقبل أزمة الدولار، لكن في الجانب الآخر فيه خبراء في البنوك والاقتصاد شايفين إن حضور عبد الله الاجتماع الحاسم رسالة بتجديد الثقة من الرئيس في شخص محافظ البنك المركزي الحالي ولأن الرئيس قال تعليمات مهمة جدا قمت المستبعد يقولها قدام مسؤول ممكن يمشي خلال أيام.
خبراء الاقتصاد بيإكدوا إن مؤسسة الرئاسة حسمت اسم محافظ البنك المركزي المصري واتبلغ لرئيس الوزراء وهيام الإعلان في أقرب وقت وشايفين أن أسهم حسن عبد الله هي الأكبر بين كل المرشحين.
ليه حسن عبد الله فرصه كبيرة جدا. في الاستمرار في منصبه محافظا المركزي.. لسبب بسيط جدا وسهل حضرتك لأن الدولة استعانت بيه عشان يلحق يسيطر على الأزمة المالية وينقذ الوضع زي ماقلنا فطبيعي الشخص اللي تحتاجه في حل الأزمات الكبرى هو افضل حد يمسك المسؤولية لأن لو فيه شخصية تانية اعلم واقوى منه في ملف البنوك وسوق الصرف والدولار والسياسات النقدية والتعامل مع ملفات حساسة جدا زي الديون والقروض وتوفير الدولار ومحاربة السوق السودا ومواجهة التضخم والمضاربات كانت الدولة استعانت بيه.
حسن عبد الله يحسبله حاجات كتير جدا لكن أهمها منع انهيار السوق المالي في مصر والسيطرة على انفلات الدولار وتحجيمه عن مستوى معين ووقف حائط صد للسوق السوداء للدولار والمضاربين وقدر في نفس الوقت ينفذ المهمة المستحيلة وهي توفير أقساط الديون الخارجية وفاتورة الاستيراد وإعفاء السلع بالجمارك وتلبية مطالب الشركات والمستوردين وكل ده في ظل أزمة نقص حاد في الدولار ودي معجزة مالية مايقدرش يحققها غير مسؤول زي عبد الله وضيف على دا وفي نفس الظروف الصعبة دي الاحتياطي بتاعك بيزيد من شهور بشكل متتالي.
