موعد التعويم الجديد.. 3 خطوات تكشف القرار المنتظر

تقريبا أكتر سؤال شاغل الناس فى مصر جاليا هو هل فيه تعويم جديد للجنيه ولا لأ؟ ولو فيه فده متوقع يحصل امتى ؟ وازاي هيحصل مع ان الرئيس السيسي بنفسه قال ان لو ده ضد مصلحة الناس مش هنعملوا؟ وايه علاقة التخفيض المحتمل فى قيمة الجنيه بصندوق النقد الدولي وبالمراجعة اللى مفروض كانت تحصل في شهر مارس اللى فات؟
 
بعد ما  فاجأ البنك المركزي الناس كلها يوم الخميس اللى فات  برفع الفائدة عكس كل  التوقعات عدد كبير من خبراء الاقتصاد شافوا الخطوة دي تمهيد لخفض جديد في قيمة الجنيه المصري أمام العملات الأجنبية، سعيًا من الحكومة لإتمام مراجعة برنامج التمويل من قبل صندوق النقد الدولي واللى حسب بعض التسريبات المفروض المراجعة دي تحصل فى شهر سبتمبر أو اكتوبر على اقصى تقدير. 
الخبراء اللى شايفين ان فيه تخفيض قادم فى سعر العملة المصرية بيقولوا ان البنك المركزي المصري ماشي بخطة واضحة وصحيحة لاستكمال الاتفاق مع صندوق النقد الدولي بعد ما رفع سعر الفائدة، وقالوا انه بناء على القرار ده  فيه احتمالية لتنفيذ إجراءات تهدف إلى ترشيد الدعم وتحريك سعر الصرف الفترة الجاية.
الخبراء بيتوقعوا كمان رفع سعر الفايدة 1% على الأقل قبل نهاية 2023 وسط توقعات برفع الدعم ولو بشكل جزئي عن المواد البترولية والكهربا اللى لسه لحد اللحظة اللى احنا بنتكلم فيها اسعارها مدعمة من الحكومة 
السبب الهم اللى بيخلى ناس كتير متوقعة خفض لقيمة الجنيه ان الفجوة بين السعر الرسمي للدولار وسعر السوق السودا فوق ال 20% ووجود سعرين للعملة مخلى المستثمرين الأجانب ما بيرضوش يضخوا استثمارات فى مصر لأنه لا عارف يحسب سعر تكلفته مشروعه ولا الأرباح المتوقعة ولا حتى مصاريف التشغيل وفكرة السوق السودا دي بتقضى على اى جهود بتعملها الدولة لجذب مستثمرين اجانب. 
ولازم ناخد بالنا ان قرار تخفيض قيمة العملة ما بقاش قرار اقتصادي صرف لكن السياسة كمان بتتدخل فى الموضوع خصوصا مع ارتفاع الاسعار بشكل كبير جدا طوال اخر سنتين ومعاناة مصر من معدل تضخم مرتفع وتخفيض قيمة الجنيه هيعمل تأثيرات سلبية  لأن صحيح معظم السلع مقيمة بالسعر غير الرسمي للدولار لكن فيه سلع أساسية مقومة بالسعر الرسمي زي الدواء والوقود والخبز وتراجع الجنيه هيكون ليه تأثير على السلع الأساسية دي.
طب امتى ممكن يحصل خفض لقيمة العملة المصري؟
معظم التوقعات بتقول ان ده مش هيحصل قبل نهاية سبتمبر او بداية اكتوبر الجاي لكن دي مجرد توقعات يعنى ممكن تحصل فعلا وممكن ما تحصلش لكن المؤكد ان أزمة الدولار بتستوحش كل يوم والحكومة بتحاول بكل الطرق تقضي عليها وتشوف مصادر دولارية جديدة.