شرط واحد لتعويم الجنيه.. إيه اللي هيحصل بعد رفع الفايدة

يا ترى امتى ممكن يتم تخفيض سعر الجنيه امام الدولار؟ وهل قرار التعويم هيحصل يعنى هيحصل ولا ممكن ما يبقاش فيه تعويم تاني؟ ولو فيه تعويم فايه الحاجة اللى الحكومة مستنية تحصل عشان تاخد القرار؟ والأهم هو سعر الدولار في البنوك ممكن يوصل لكام؟
 
في مفاجأة غير متوقعة بالمرة لجنة السياسة النقدية في البنك المركزي قررت يوم الخميس اللى فات رفع سعر الفايدة 100 نقطة أساس رغم ان معظم توقعات بنوك الاستثمار ومراكز الأبحاث كانت شايفة ان القرار الأقرب هو تثبيت سعر الفايدة في مصر.. والسؤال اللى شاغلة كل الناس دلوقتي وتحديدا الاوساط المالية سواء داخل او خارج مصر هو ليه البنك المركزي رفع سعر الفايدة؟ وايه علاقة ده بالتحريك المحتمل لسعر الجنيه قدام سلة العملات الأجنبية؟
في الفترة الأخيرة الكلام عن تحريك سعر الصرف في مصر رجع من جديد بعد مجموعة التقارير الدولية اتكلمت عن اضطرار الحكومة لخفض قيمة الجنيه وبيربط كتير من الناس بين رفع الفائدة والتخفيض المتوقع لقيمة العملة المصرية بهدف السيطرة على التضخم الناتج عن انخفاض قيمة الجنيه وسحب السيولة من الأسواق.

وغالبًا بيتزامن إعلان رفع الفائدة مع تعديل تعويم محتمل للجنيه وده حصل في 4 تخفيضات سابقة للعملة بداية من تعويم 2016، مرورا بالتعويم اللى حصل في  مارس وأكتوبر 2022، ونهاية بتعويم يناير 2023.
وطبعا بقينا كلنا عارفين ان تحرير سعر صرف الجنيه المصري أمام العملات الأجنبية واحد من أهم شروط صندوق النقد اللي تم الاتفاق عليها مع الحكومة المصرية، وللسبب ده  ما تمش إجراء المراجعة الأولى في مارس اللى فات  زي ما كان مخطط ليها لأن الحكومة شايفة انها بتطبق سعر صرف حر للجنيه وان العملة المصرية مقيمة بأقل من سعرها الحقيقي بسبب ازمة نقص العملة الأجنبية 
طب ايه الشرط اللى لو اتحقق الحكومة ممكن الصبح تعمل تعويم جديد للجنيه؟
في اى بلد في العالم عشان تحرر سعر صرف عملتها لازم يكون عندها رصيد كبير من الدولار قبل ما تاخد أي قرار بتخفيض قيمة عملتها لأن لو ده حصل من غير ما تأمن نفسها برصيد كافى من العملة الأجنبية ممكن عملتها تنهار بشكل فورى وده هيكون ليه تأثيرات على حياة الناس هيتم ترجمتها في ارتفاع غير مسبوق في أسعار السلع وده اللى يمكن شاور عليه السيسي لما قال ان مصر بتطبق سعر صرف مرن لكن لو ده هييجى على حياة الناس مصر مش هتعملوا حتى لو بيتعارض مع شروط الصندوق

وعشان كده الحكومة شغالة حاليا على جمع أكبر كمية من العملات الأجنبية قبل السماح للجنيه بالتعويم لاحتواء التأثير المحتمل على تكلفة المعيشة والحسابات المالية.
طب الحكومة هتجيب دوولارات تأمن بيها الجنيه منين؟ 
فيه أكتر من قطاع وملف الحكومة شغالة فيهم أهمهم وأولهم طبعا ملفا الطروحات الحكومية وبيع مجوعة من الأصول المملوكة للدولة ووفقا للارقام المعلنة فمصر متوقع تجمع 40 مليار دولار من الطروحات دي خلال ال 4 سنين الجايين كمان السياحة بدأت تنشط وعوايدها بترتفع والمفروض على نهاية السنة دي يكون زار مصر اكتر من 15 مليون سايح وده اعلى رقم في تاريخ السياحة المصرية ومتوقع مصر تجنى حوالى 15 مليار دولار من السياحة بالإضافة لقناة السويس اللى محققة لحد النهاردة ما يقرب من ال 10 مليار دولار وفيه عوايد متوقعة السنة دي ممكن توصل ل 14 مليار دولار وأخيرا طبعا الصادرات المصرية للخارج وأهمها صادرات الغاز اللى حاصل فيها طفرة كبيرة مؤخرا