اية الدول اللي هاتتأثر بوقف اتفاقية الحبوب.. ومصر هاتتصرف ازاي؟

اكتر دولتين عندهم قمح هما روسيا وأوكرانيا.. حرفيا بيصدروا لأغلب دول العالم.

لكن روسيا فاجأت الجميع وانسحبت من اتفاقية الحبوب واللي بتنص على السماح بتأمين تصدير الحبوب وسط الحرب الدائرة

وروسيا عملت كدا علشان بالبلدي كدا تلوي دراع أوروبا اللي بتستورد منها قمح.. خاصة أن أوروبا وامريكا فارضين عليها عقوبات اقتصادية.

لكن الدول الأفريقية هي اكتر دول متضررة من الموضوع دا زي  نيجيريا، ومالي، والسنغال، اللي عندهم أصلا أزمات غذائية وصحية من الدرجة الأولى .. و في المنطقة العربية: الدول الأكثر استيرادا للحبوب من أوكرانيا، هي: مصر (بتستورد منها 53% من احتياجاتها)، وليبيا بتستورد 40%..  والجزائر بتستورد 30%.

لكن مصر في الوقت الحالي بتحاول تنوع من مصادر الاستيراد زي المباحثات الجارية بينها وبين الهند لاستيراد كميات الحبوب.. وكمان مصر عندها علاقات قوية مع روسيا وبينهم مشاريع اقتصادية مشتركة ودا يدعم أسهمها في تمرير الحبوب ودا اللي أشار الرئيس السيسي في القمة الأفريقية الروسية لما أكد على ضرورة دعم الدول الأفريقية.. كمان مصر عندها مخزون استراتيجي من القمح يكفيها لآخر السنة.. يعني ماتقلقوش الموضوع بإذن الله هايتحل.