الضربة الأخيرة.. مصر شريك في سوق جديد حجمه 3.2 تريليون دولار

مفيش شك إن الشهور الأخيرة في مصر من أصعب الفترات اللي مرت على المصريين بسبب الأوضاع الاقتصادية الصعبة واللي أثرت على الحياة المعيشية لناس كتير لكن الصعب عدى ومش فاضل غير مسافة قليلة على أول ضوء في نفق الأزمة.. إزاي مصر فكرت بره الصندوق وليه الثقة في الخروج من كل الازمات وايه حكاية التحالف الجديد اللي مصر داخلاه وهيغير الموازين

الحكومة المصرية زي ماقلنا عملت المستحيل للخروج من المأزق الاقتصادي الحالي ولولا الإجراءات اللي جوه وبره الصندوق كان زمانا عايشين حالة انهيار كبيرة، وكان الدولار خرج عن السيطرة والاسعار فلتت بشكل كبير وكانت الناس هتصرخ من الغلاء والأسعار، ومن بين الأفكار اللي خدتها الحكومة فتح قنوات جديدة مع تجمعات دولية قوية للدخول معاها في تحالفات تخفف من وتيرة الازمة الاقتصادية وتدي فرص أكتر قدام الدولة المصرية.

وعشان كده مصر اتعاونت مع دول البريكس للانضمام الرسمي للمجموعة وانضمت بشكل فعلي للبنك الجديد التابع ليها، بغرض التعامل مع دولها بعيدا عن الدولار الأمريكي واللي مصر بتعاني من نقص المعروض فيه ومن السوق السودا اللي ظهرت في الأزمة وكمان مصر دخلت في مفاوضات مع دول تانية عشان التعامل يبقي بالعملة الوطنية زي ما حصل مع تركيا والهند وغيرها. 
أخر حاجة مصر قررت تعملها لتخفيف الاعتماد على الدولار وفتح مجالات واسعة في التحالفات التجارية الدولية هو نجاح الجولة الخامسة لمفاوضات اتفاق التجارة الحرة بين مصر ودول الاتحاد الاقتصادى الأوراسى، و الاتحاد الاوراسي الاقتصادي  هو اتحاد اقتصادي دولي بيهدف للتكامل في القضايا الاقتصادية بين الدول المنضمة له، ويعمل الاتحاد منذ 1 يناير 2015، ويضم في عضويته روسيا وأرمينيا وبيلاروسيا وكازاخستان وقيرغيزستان، ويصل إجمالي الناتج المحلي لدول الاتحاد الاوراسي الاقتصادي أكثر من 3.2 ترليون دولار وفق المعلومات المتاحة حالياً، يعني كيان مالي وتجاري عملاق وسوق ملهوش أول من أخر.

ومن ساعات أعلن نائب رئيس الوزراء الروسي، أليكسي أوفرتشوك، إن الجولة السادسة من المفاوضات بين الاتحاد الاقتصادي الأوراسي ومصر حول إنشاء منطقة تجارة حرة مقررة في أغسطس - سبتمبر.

وقال أوفرتشوك على هامش القمة الروسية الإفريقية الثانية إن فيه  مفاوضات شغالة بشأن توقيع اتفاقية تجارة حرة مع مصر، وإنه عقدت خمس جولات من المفاوضات بالفعل، ومن المتوقع إجراء الجولة السادسة في أغسطس وسبتمبر، ودا اللي نقلته  وكالة تاس للأنباء.

وفي مايو اللي فات، أكد وزير التنمية الاقتصادية الروسي، مكسيم ريشيتنيكوف، أن الاتحاد الاقتصادي الأوراسي يجري مفاوضات لإنشاء مناطق تجارة حرة مع الإمارات العربية المتحدة وإندونيسيا ومصر.
ومعنى كده إن مصر داخلة على سوق حجمه 3.2 ترليون دولار وسوق واسعة وفرص واعدة وهضيف إمكانيات ملهاش حصر للاقتصاد المصري.