شهادات دولارية جديدة.. إيه اللي بيحصل فى بنوك مصر؟

واضح ان طرح شهادات بالدولار مش هيتوقف على البنوك الحكومية سواء البنك الاهلى او بنك مصر وشكلنا كده هنشوف شهادات دولارية جديدة الأيام الجاية... فيا ترى ايه اللى بيحصل فى بنوك مصر؟ وايه حكاية الشهادات الدولارية دي؟ ومين البنوك اللى بتدرس انها تصدر الشهادات؟

واحنا بنتكلم مع حضراتكم حاليا فيه أكتر من بنك بيدرسوا إمكانية طرح شهادات دولارية مرتفعة العائد زي ما عمل البنك الأهلى وبنك مصر فى اطار سياسة مصرفية بتستهدف الاستفادة من كمية الدولار الموجود خارج الجهاز المصرفي فى محاولة للسيطرة على السوق السودا.
وأصدر البنك الأهلي و بنك مصر شهادتين ادخاريتين بعائد مرتفع للدولار، وبتتيح الشهادة الأولى في كل بنك فايدة 9% تُصرف بالجنيه ومقدماً عن السنوات الـ 3 يعني 27% مقدما ، وكمان الاقتراض بضمان الشهادة لغاية 50% من قيمتها، أما الشهادة التانية فبفايدة 7% تصرف كل 3 شهور بالدولار.

البنك العقارى المصري العربي واحد من البنوك اللي أعلنت بالفعل انها بتدرس بشكل جدي اصدر شهادة بالدولار وأكد وليد ناجي نائب رئيس مجلس ادارة البنك هيعقد اجتماع خلال الأسبوع الجاري لدراسة الشهادات الدولارية المطروحة وقال ان القرار النهائي هيصدر الاسبوع الجاي.
نائب رئيس مجلس ادارة البنك العقارى المصري العربي  قال أن الشهادات الدولارية الجديدة بتستهدف جذب المصريين المغتربين بالخارج بهدف إيداع أموالهم في شهادات دولارية ذات عائد مرتفع، واللى مش بيتوفر مثيل ليها في البنوك الخارجية، وكمان للناس اللى بتحتفظ بمدخراتهم الدولارية خارج القطاع المصرفي.

مش بس البنك العقارى المصري العربي اللى أعلن عن امكانية طرح شهادة بالدولار وأكد محمد عباس فايد الرئيس التنفيذي لبنك أبوظبى الأول إن فكرة طرح البنك لأوعية ادخارية دولارية جديدة خلال الفترة الجاية تحت الدراسة حاليًا، وبتتوقف على مدى احتياجات البنك ورغبة العملاء.

فايد أكد ان البنوك مش بتستخدم حصيلة مدخرات العملاء في تمويل الورادات، ولكن بيتم توظيفها في عمليات الإقراض أو شراء السندات الدولارية بينما الدولارات المخصصة للواردات بتيجي عن طريق تنازلات وبعدين استخدامها في الاعتمادات المستندية.