رقم يخوف..لأول مرة البنوك تكشف حجم السوق السوداء للدولار

النهاردة يوم تاريخي في حياة البنوك وأصحاب المدخرات وحائزي الدولار مع تفعيل العمل وشراء الشهادات الادخارية الدولارية الجديدة واللي طرحها من ساعات الأكبر بنكين في البلد وبعدها طلعت تصريحات مهمة على لسان قيادات البنوك كشفت لأول مرة عن مفاجأة من العيار التقيل.. ياترى ايه هي المفاجأة وايه علاقتها بالسوق السودا للدولار وأهميتها في تحديد سعر الصرف في الأيام اللي جاية.
 
زي ماقلنا البنك الأهلي وبنك مصر أعلنوا  امبارح عن إصدار شهادات بالدولار النهارده بعائد 7% و،9% بالدولار، في أول محاولة جريئة وبعائدات كبيرة لجذب الدولار اللي في السوق السودا ودولارات تحت الطلب المخصصة للمضاربات وقت الازمات في سوق الدهب وغيرها واستغلال ارتفاع الأسعار واستثمار الدولارات في تحقيق أرباح من المضاربة وبتقعد الدولارات دي وتتخزن وتتطلع وقت الأزمات.
وبعد طرح الشهادات الجديدة طلع مسئويم كبار في البنكين يشرحوا للناس تفاصيل التعامل عليهم وحساب الأرباح ومدتها وشروط شراء الشهادات وكان من بين المفاجآت اللي اتقالت على لسان المسولين هي إن العميل اللي عاوز يشتري الشهادة محدش هيسأله جبت الدولارات دي منين، ولكن أهم معلومة خطيرة اتقالت امبارح كانت على لسان نائب محافظ البنك الأهلي وقالها في مداخلة على الهواء مباشرة بوجود أكتر من 4 مليار دولار خارج النظام المصرفي، يعني المبلغ دا موجود في السوق السودا للدولار وتجار المضاربات في الدهب ودا أول تصريح رسمي عن حجم السوق السودا للعملة الأمريكية يتقال علنا، وطبعا كشف حجم المبلغ بيأكد على حاجة مهمة جدا وهي إن الدولة متابعة حركة سير الدولار خارج النطاق المصرفي وعارفه حجمه بالأرقام ولما يكون فيه معلومات دقيقة يبقي فيه حلول قوية وواضحة لمواجهة وحصار السوق السودا وتحجيمها.
وزي مقال المسئول الكبير إن الـ4 مليار دولار مبلغ كبير جداً ومهم أنه يرجع طبعا داخل منظومة الإطار المصرفي والشهادات الدولارية خطوة  مهمة جدا ومضمونة لاستعادة الدولارات اللي بره النظام المصرفي والبنوك وضمان عدم استغلال الأموال دي في المضاربة بالذه أو ظاهرة الدولارة من السوق السودا مع ارتباك حركة الدولار والمضاربة ووجود أكتر من سعر في السوق.