خنق السوق السوداء للدولار.. ضربة البنك المركزي لعصابات العُملة

لو فاكرين حضراتكم من فترة هنا وعلى كل منصات بانكير كنا أول ناس حذرنا من عصابات الدولار ومن الألاعيب اللي بتمارسها العصابات دي لحرمان مصر من سيولة دولارية كبيرة في وقت مصر محتاجة فيه لكل سنت مش دولار.. وقولنا لحضراتكم ان اللعب مع الحكومة والبنك المركزي خد أبعاد جديدة وتخطى حدود الوطن الى الخارج.. وشرحنا إزاي فيه ناس بتتواصل مع المصريين العاملين فى الخارج وبنتشترى منهم الدولار بأعلى من سعره فى السوق السودا فى مصر وبتشترط انها تستلم العملة المريكية بره وبتسلم اسر وأهالى العاملين سعرها هنا في مصر بالجنيه.. وأكدنا لحضراتكم ان البنك المركزي مش هيسكت وانه هيوجه ضربة قاضية للعصابات دي.. وفى الساعات الأخيرة حصل اول تحرك رسمي من المركزي للقضاء على العصابات دي .. فيا ترى ايه اللى حصل ؟ وهل الحكومة هتقدر تواجه عصابات الدولار ؟ 

 
من فترة قريبة البنك المركزي أعلن تراجع تحويلات المصريين العاملين في الخارج بنحو 26 % في الفترة بين يوليو 2022 إلى مارس 2023 في الوقت اللي بتعاني فيه مصر من شح العملة الصعبة
وأظهرت بيانات البنك المركزي المصري عن أداء ميزان المدفوعات ان تحويلات المصريين بالخارج انخفضت إلى حوالي 17.5 مليار دولار في الفترة ما بين يوليو ومارس من العام المالي الجاري مقابل نحو 23.6 مليار دولار في نفس الفترة من العام الماضي.  
ده نتيجة الكلام اللى قولنا لحضراتكم من بدري لأن قطاع كبير من العاملين فى الخارج بقا يبيع الدولار من بره بره وياخد سعر أعلى حتى من سعر السوق السودا وده لأن اللي شغال في الخارج بيدور ازاى يحقق أعلى استفادة وعشان كده البنك المركزي اتدخل من خلال أكبر بنكين فى مصر البنك الأهلى وبنك مصر وعمل ضربة معلم امبارح اللي اصدروا شهادات دولارية جديدة بعائد مرتفع جدا وكمان أتاحوا الحصول على قروض بقيمة 50 % من تمن الشهادة بالاضافة الى امكانية سحب فوايد الشهدات مقدما وكل دي اغراءات وعوامل لجذب المصريين فى الخارج وأسرهم لاستثمار الدولارات اللى معاهم من خلال القنوات الرسمية وحرمان تجار العملة وعصابات الدولار من توجيه ضربات جديدة للاقتصاد المصري 
ولو حضرتك عاوز تعرف خطورة اللى بيحصل ففى خلال 9 شهور بس تحويلات المصريين فى الخارج قلت بما يقرب من 6 ونص مليار دولار فى وقت مصر بتمر فيه بواحدة من أخطر الزمات فى تاريخها أزمة شح الدولار ونقص العملة الأجنبية يعنى فى الوقت اللي الحكومة بتدور فيه على أى دولار زيادة العصابات دي بتخسر مصر رقم ضخم جدا 
وعشان كده البنك المركزي مش هيكتفى باللى حصل بس وخلال الأيام الجاية هيكون فيه قرارات جديدة لخنق السوق السودا والقضاء عليها بشكل نهائي وبالتوازي مع قرارات المركزي فالرقابة هتزيد واى حد هيتمسك بيغير عملة خارج البنوك هيواجه اشد العقوبات