ليه أزمة الكهربا رجعت بعد 8 سنين؟.. هنقولك اللي محدش عاوز يقولوا؟
يا ترى ليه ازمة انقطاع التيار الكهربائي رجعت تناى بعد 8 سنين ؟ وايه سر موضوع تخفيف الأحمال ده ؟ ومتوقع الأزمة تستمر لغاية امتى ؟ وهل الموضوع فعلا ليه علاقة بتصدير الغاز للخارج؟ وليه الحكومة ما صارحتش الناس بالأزمة من الأول؟
من سنة 2015 وأزمة الكهربا انتهت تماما في مصر ومحدش خلال ال 8 سنين اللى فاتوا كان بيشتكي من انقطاع الكهربا لحد ما اتفاجيء كتير من المصريين بداية الأسبوع اللى فات بانقطاع متكرر في التيار مش يوم واحد ولا اتنين ولا تلاتة لا ده كل يوم تقريبا في الأول محدش كان فاهم ايه اللى بيحصل لا وزارة الكهربا أعلنت خطة تخفيف احمال ولا الحكومة قالت ايه اللى بيحصل ومع استمرار الأزمة وسؤال الناس خصوصا على منصات التواصل الاجتماعي خرج أخيرا رئيس مجلس الوزراء الدكتور مصطفى مدبولى واعلن ان فيه خطة لتخفيف الأحمال هتستمر حوالى 10 أيام
رئيس الوزراء أكد ان تخفيف الأحمال نتيجة للموجة الحارة الشديدة اللى بتعيشها مصر مؤخرا ، وزيادة استهلاك الطاقة الكهربائية بصورة كبيرة، وهو ما انعكس أيضا على زيادة حجم استهلاك الغاز المستخدم في انتاج الكهرباء، وإحداث ضغط شديد على الشبكات الخاصة بيه ، وان ده أدي إلى انخفاض ضغوط الغاز في الشبكات الموصلة لمحطات الكهرباء
رئيس الحكومة قال كمان انه مع انخفاض الضغوط تم البدء منذ في تخفيف الأحمال عشان نقدر نوصل للضغوط العادية لشبكة الغاز،وأكد الاستمرار في تخفيف الأحمال بالتناوب عشان تستعيد الشبكة ضغوطها من الغاز.
رئيس الوزرا كشف ان شركات وزارة الكهرباء بتنفذ خطة لتخفيف الأحمال على مدار اليوم بكل محافظة، بتتضمن فصل التيار الكهربائي لمدة تتراوح بين ساعة لغاية ساعتين، وقال ان ممكن سيتم التكرار مرة تانية لو دعت الحاجة إلى تخفيف الأحمال، باستثناء المناطق الاستراتيجية كالمستشفيات وأقسام الشرطة والفنادق والمؤسسات الحيوية زي محطات مياه الشرب والصرف الصحي وغيرها.
وزير الكهربا هو كمان أتكلم عن الأزمة وقال ان الحل الوحيد حالياً للخروج من أزمة الانقطاعات الناتجة من تخفيف الأحمال هو ترشيد استهلاك الكهربا لخفض الضغط على شبكة الغاز لحين عودتها بشكل قوى واكد انه من المتوقع الاستمرار في اللجوء لتخفيف الأحمال حتى منتصف الأسبوع الجاي
الغريبة ان عودة الأزمة الحادة لانقطاع الكهربا المتكرر بعد ما نجحت مصر في تحقيق الاكتفاء الذاتي من الغاز المستخدم في الأساس لتغذية محطات الطاقة التقليدية، مع تصدير الكميات الفائضة عن الاستهلاك للاستفادة من سعر الغاز المرتفع في تدبير عملة صعبة في ظل أزمة شح الدولار الطاحنة اللي بنعاني منها = منذ اندلاع الحرب الروسية في أوكرانيا في مارس 2022.
وبتستهدف خطة الحكومة لترشيد استهلاك الكهرباء خفض الاستهلاك 18% من إجمالي الطاقة المستهلكة على مستوى محافظات الجمهورية بحلول 2035، وبيمثل استهلاك قطاع الكهرباء نحو 60 %من إجمالي استهلاك الغاز في مصر.
وكل تخفيض في حجم استهلاك الكهربا بيتحول الى كميات كبيرة من الغاز بيتم تصديرها للخارج وبتدر سيولة دولارية تسند شوية في أزمة نقص العملة وبتقلل الضغط على الاحتياطي النقدي
