ايه اللي هيستفادوا العرب من بريكس؟

 
بحكم التاريخ والجغرافيا أغلب الدول العربية كانت مرتبطة بعلاقات قوية جدا مع الولايات المتحدة الأمريكية تحديدا من سبعينيات القرن الماضي لما أمريكا عرفت بذكاء تأسس لعصر البترودولار واللى من خلاله قدرت تضمن تفوق كاسح لعملتها خلت معظم دول العالم مربوطة اقتصاديا بالاقتصاد الأمريكي.. لكن مؤخرا كتير من الدول العربية بدأت تفكر بمنطقة المصلحة وترفع شعار معروف جدا في عالم السياسة وهو " اللى تغلبوا العبوا" وعشان كده شفنا أكتر من دولة عربية ومنهم دول كبيرة جدا بدأوا في التحرر من هيمنة الدولار الأمريكي واتقدموا بطلبات للانضمام الى تحالف بريكس اللى بتقوده الصين وروسيا واللى واحد من أهم اهداف انهاء نفوذ العملة الأمريكية واستحداث عملة عالمية جديدة تقدر تنافس الدولار.. فيا ترى ليه الدول العربية بتعمل كده؟ وايه موقف الأمريكان من اللى بيحصل؟ وهل فيه فوايد من الانضمام لتحالف بريكس ؟ 
لازم نكون عارفين ان السياسة مفيهاش مباديء ثابتة واللى بيحكمها المصلحة وكل بلد من حقها تدور على مصالحها وده اللى بتطبقوا الدول العربية في السنين الأخيرة وعلى راسها بشكل أساسي المملكة العربية السعودية اللى رغم علاقتها الوثيقة بالامريكان الا انها بدأت في فتح قنوات ومد جسور تعاون مع قوى وكتل عالمية بتناصب الأمريكان العداء في السر والعلن ومنهم طبعا الصين اللى السعودية بتتعاون معاها اقتصاديا على اعلى مستوى وفيه كمان تنسيق تجاري وتعاون مع الروس في ملفات النفط والحبوب.. وطلبت المملكة الانضمام لتحالف بريكس اللى بيشكل قوة اقتصادية وسياسية مهمة في مواجهة نفوذ أمريكا. 
مصر دخلت هي كمان على الخط وطلبت رسميا الانضمام لبريكس وبدأت أولى الخطوات بالانضمم الى بنك التنمية الجديد اللى اسسه التحالف واللى المفروض هيكون بديل صندوق النقد وهيكون مؤسسة تمويلية ضخمة هتقدم التمويل للدول الأعضاء ولكن بشروط وفوائد مختلفة تماما عن اللى بيعملوا المسئولين في صندوق النقد.
مش مصر والسعودية بس المهتمين باللحاق بركب بريكس فيه دول تانية كتيرة زي الامارات وتونس والجزائر والمغرب ومؤكد هتنضم ليهم دول تانية مستقبلا في ظل وضع عالمي متأزم كل دولة فيه مهتمة بمشاكلها ومحدش فاضي يحل مشاكل حد 
وطبعا انضمام الدول العربية لبريكس ليه فوايد كبيرة أهمها اتفاقيات مبادلة العملة اللى بيعملها التحالف واللى بيكون شرط أساسي من شروطها ان عمليات التبادل التجارى بين اى دلوتين يكون بالعملة الوطنية لكل بلد وده هيخفف الضغط على الاحتياطي الدولاري وهيزود مصادر الاستيراد وهيخلى الدول تشترى احتياجاتها بأرخص الأسعار.