22 دولة تعلن الحرب على الدولار.. إيه اللي بيحصل في الكواليس؟
كلنا عارفين ان روسيا ومعاها الصين بيتحركوا بقوة لاستحداث عملة جديدة تقضى على هيمنة الدولار وتحرر العالم من قبضة الأمريكان .. وده من خلال تجمع مهم اسمه البريكس بيضم حاليا الصين وروسيا والهند وجنوب افريقيا ومعاهم البرازيل.. لكن الموضوع ما وقفش على ال 5 دول بس لا ده فيه تطور مهم وخطير بيهدد وجود العملة الأمريكية وبيقول ان الأيام الجاية مش هتكون سهلة أبدا على العملة اللى بقالها عقود مسيطرة على حركة التجارة وعلى الاحتياطي النقدي لمعظم الدولة.. فيا ترى ايه الجديد اللي حصل ؟ وايه موقف الادارة الامريكية من التحركات اللي بتقودها روسيا؟ وهل فعلا ممكن قريب نشوف عملة بتنافس الدولار؟
الشهر الجاي فيه اجتماع مهم جدا لمجموعة البريكس هيعقد فى عاصمة جنوب افريقيا.. وأهمية الاجتماع ده انه هيناقش لأول مرة قبول عضوية دول جديدة فى التحالف اللي هيكون ليه تأثير كبير على حركة التجارة فى العالم الفترة الجاية
طب كام عدد الدول اللى عاوز تنضم لبريكس ؟ ومين أشهر الدول دي؟
وفقا للتسريبات اللى طالعة من جنوب افريقيا ففيه حوالى 22 دولة اتقدمت رسميًا بطلبات للانضمام إلى المجموعة وأكد أنيل سوكلال، سفير جنوب أفريقيا لدى "بريكس"، بأن عدد مماثل بيسعى بشكل غير رسمي للانضمام إلى بريكس.
ومن أشهر الدول اللى طلبت الانضمام لبريكس مصر والسعودية وايران والامارات والجزائر، ، والبحرين، وإندونيسيا.
وبدأت بريكس فى توسيع نشاط التبادل التجاري بين أعضائها بالعملات المحلية بديلا عن الدولار يعنى التعامل فى العمليات التجارية بيكون باليوان او الروبل مش بالدولار.
وبتسعى المجموعة اللى اتشكلت في 2009 لكسب المزيد من النفوذ عالميا كوسيلة لموازنة هيمنة الولايات المتحدة وحلفائها التقليديين في المؤسسات المالية متعددة الأطراف زي البنك الدولي وصندوق النقد الدولي.
وأعلنت بريكس عن تأسيس بنك التنمية الجديد، اللى بيمثل جزء رئيسي من استراتيجية "بريكس" وبيبلغ رأسماله المكتتب 50 مليار دولار وبيخطط لإضافة العديد من الدول الأعضاء الجديدة من الأسواق الناشئة فى 2023 في محاولة لتوسيع قدرته على الإقراض.
طب ايه موقف الامريكان من اللى بيحصل؟
فيه رعب بيسيطر على صناع السياسات المالية فى امريكا لأن المحاولات دي لو نجحت فى هز عرش الدولار هيكون ليها تاثير كبير جدا على نفوذ امريكا عالميا خصوصا ان جزء كبير من هيمنتها على العالم ليها علاقة بان كل حاجة متسعرة على الدولار وده من سبعينيات القرن الماضي لما بدأ ما يعرف بعصر البترودولار واللى من خلاله تم رسميا ربط سعر النفط بالعملة الأمريكية
