إمتى الذهب يوصل لسعره العادل؟.. نهاية زمن دولار الصاغة

هو إمتى الدهب ممكن يوصل لسعره العادل؟ وايه سبب الفجوة الكبيرة بين السعر العالمي والسعر المحلي؟ وليه الدولار فى سوق الصاغة معدي الـ 40 جنيه؟وهل فيه تلاعب بيحصل من حيتان السوق ولا الأسعار اللى بنشوفها ونسمعها طبيعية؟ 
 
فيه حاجة غريبة جدا بتحصل فى سوق الدهب فى مصر كل خبراء الاقتصاد والمحللين احتاروا فى تفسيرها او فهم اسبابها.. حاجة كده تقريبا ما بتحضلش غير عندنا هنا بس.. يعنى مثلا خد عندك الدهب سعره عالميا من حوالى شهر كان 1920 دولار للأوقية وسعر الدهب عندنا كان حوالى 2180دولار السعر العالمى النهاردة وصل الى ما يقرب من 1990 دولار يعنى زيادة فى الاوقية الواحدة حوالى 70 دولار ورغم كده لسه سعر الجرام عندنا بحوالى 2180 دولار برضوا يعنى السعر عالمي يطلع السعر عندنا زي ما هو ينزل السعر برضوا زي ما هو .. فيا ترى ايه السبب فى كده ؟ وامتى ممكن نوصل للسعر العادل اللى يكون فيه سعر جرام الدهب عندنا موازى لسعره العالمي؟ 
بص يا سيدي فيه عوامل كتير جدا بتتحكم فى سعر الدهب فى مصر منها السعر العالمي وسعر الدولار وكمان حجم العرض والطلب وللأسف زمان كان الدهب بيحدد سعر الدهب بيتحدد بناء على سعر الدولار فى السوق لكن حاليا الدهب هو اللى بيحدد سعر الدولار وفيه مصطلح بيتم تداولوا بين محلات الدهب والناس اللي بتشترى عن سعر دولار الصاغة والمقصود بيه السعر اللى مقيم بيه الدولار بين الناس اللى بتشترى دهب وسعر الدولار ده وصل فى بعض الأحيان لفوق ال 40 جنيه رغم انسعر الدولار فى البنك بيدور فى مستوى ال 31 جنيه وحتى فى السوق السودا آخره 38 جنيه 
يعنى حضرتك سعر دولار الصاغة اعلى حتى من السوق الموازية للعملة 
حد هيسأل ويقول وهو احنا نحسب السعر العادل للدهب ازاى ؟ او بمعنى ادق ازاى نعرف الفرق بين السعر العالمي للدهب وسعره عندنا فى مصر؟ 
هناخد مثال يوضح الموضوع أكتر 
لو حضرتك عاوز تشترى دهب عيار 21 هتضرب السعر العالمي للأوقية اللى هو حاليا حوالى 1980 دولار في سعر الدولار النهاردة اللى هو 31 جنيه وتقسم الناتج على 35 جرام و55 ملى اللى هما وزن الأوقية والناتج هو قيمة سعر الجرام عالميا قارنوا بسعر الدهب محليا والفارق بين السعرين هو الرقم الزيادة فى سعر الجرام 
يعنى لو ضربنا 1980 سعر الأوقية عالميا فى 31 سعر الدولار فى البنوك الناتج هيكون حوالى 1726 جنيه وهو ده المفروض السعرالعادل للجرام  
يعنى فيه فرق أكتر من 500 جنيه بين السعر العالمي والسعر المحلى