اكتشاف بمليارات.. ايه حكاية حزام الدهب المصري الجديد

مصر بلد الدهب ومن آلاف السنين الدهب في مصر كان ارخص من التراب، ومن سنين ملهاش اخر كانت مصر أول دولة في العالم تعرف صناعة التعدين وطلع الدهب من قلب الجبال وتشكله وتصنع منه اجمل التحف والتماثيل في العالم ومناجم الفراعنة تشهد لغاية دلوقتي بالاعجاز دا ويظهر إن مصر لسه بلد الدهب والخير وكل يوم فيه أخبار ومفاجآت في قطاع التعدين والدهب.. ياترى ايه اخر مفاجأة ومصر اكتشفت ايه جديد من الكنوز.

مارتن هورجان، الرئيس التنفيذي لشركة سنتامين للتعدين والتنقيب عن الدهب، وهي الشركة المُشغلة لمنجم السكري طلع فجأو وقال في بيان رسمي  أن سوق التعدين في مصر واعد جدا وفيه كنوز لسه مطلعتش من باطن الأرض وإن التحركات المصرية القادمة في مجال التعدين والتنقيب عن الذهب هتكشف عن مفاجآت.

 هورجان كشف لاول مرة في بيانه تفاصيل الاكتشافات المتوقعة للدهب في منطقة اسمها حزام الدهب المصري بمنطقة الدرع العربي النوبي.. طبعا دا كلام جديد خالص ايه حكاية منطقة حزام الدهب المصري الجديد واللي قال عليها إنها منطقة واعدة وفيها مخزون دهب فريد من نوعه.. شوف حضرتك منطقة الدرع العربي النوبي دي منطقة بتتشارك فيها عدة دول مختلفة على جانبي البحر الأحمر، وتشمل أجزاء من مصر والسعودية وفلسطين والأردن والسودان، وكمان  إريتريا وإثيوپيا واليمن، والصومال، يعني زي ما اهلنا زمان كانوا يقولوا عليه عرق دهب وهي بتكون عبارة عن سلسلة مناجم زي حلقات السلسلة في منطقة كبيرة.

وبيعتبر الدرع النوبي في مصر والسودان والدرع العربي في شبه الجزيرة العربية جزء من كتلة شرق أفريقيا الجبلية الممتدة في شرق إفريقيا وانفصل قديما الدرع العربي عن الدرع النوبي بفعل أخدود البحر الأحمر.
وبحسب التوقعات الدرع الذهبي المصري فيه احتياطيات ضخمة ومؤكدة وفق تقارير المسح الجيولوجي وبقيمة ضخمة من الإيرادات المتوقعة وقريب هتبدأ عمليات التنقيب الرسمية عشان تطلع كنوز من الدهب.
عمرو حسونة، المدير التنفيذي لشركة السكري لمناجم الذهب علق على الموضوع وقال إن أعمال التنقيب والاستكشاف الخاصة بنا في المساحة الجديدة جات بحجم 3000 كم مربع في الصحراء الشرقية للتنقيب، وإن الشركة بدأت من خلال برامج أعمال الحفر الشهر الماضي بعد الانتهاء من أعمال العينات السطحية لتحديد أهداف الحفر على مدار العام الماضي والنصف الأول من العام الحالي.

وبالمناسبة مصر  بتستضيف زي مونديال شركات التنقيب العالمية النهاردة التلات ولمدة يومين وهو منتدي عالمي بيحضره قادة صناعة التعدين بالمنطقة والعالم وشركات التعدين العالمية بجانب للمستثمرين وشركات الخدمات والموردين في سوق الدهب العالمي.