الدولار بينهار في الخارج ..ليه مش بينزل في مصر

معروف في عالم الاسهم والبورصات والعملة والمعادن إن الأسعار العالمية لاي حاجة منهم بتأثر تأثير مباشر في الأسواق المحلية للدول.. طيب ليه الدولار مش بينزل في مصر رغم إن سعره تقريبا بينهار بره. 
من ساعات قالت تقارير الأسعار الدولية للعملة إن مؤشر الدولار ترنح قرب أدنى مستوياته في أكثر من عام ،وكنان فيه حالة ترقب من المستثمرين اللي منتظرين هبوط جديد للدولار في أعقاب تقرير التضخم اللي صدر أخف وطأة من المتوقع الأسبوع الماضي.

وتراجع مؤشر الدولار، اللي بيقيس أداء العملة الأميركية أمام سلة من ست عملات رئيسة، بنسبة إلى 99.84 في التعاملات الآسيوية المبكرة بعدما هوى لأدنى مستوياته منذ أبريل  2022 الجمعة اللي فاتت.

كما سجل مؤشر الدولار أسوأ أداء أسبوعي ليه خلال 2023 في الأسبوع الماضي بعدما أظهرت بيانات مزيداً من التراجع في التضخم بالولايات المتحدة مع تسجيل أسعار المستهلكين أقل زيادة سنوية في أكتر من عامين.
الدولار زي الدهب زي ما قلنا وسعره بيزيد ويقل في السوق المحلي حسب سعره في الخارج لارتباط الاسواق ببعضها واسعار الاستيراد والمفروض دا بيحصل في سوق العملات الدولية زي الدولار، يعني المفروض السعر ينزل في مصر لما ينزل في أسواق الصرف الدولية لكن فيه حاجات تانية في مصر بتحديد سعر الدولار داخليا أهمها حالة العرض والطلب ووفرة المعروض من العملة ولأن فيه خلل كبير بين العرض والطلب في مصر وارتفاع المطلوب عن المعروض وعدم وصول التدفقات الدولارية لحالة الذروة كل دا سبب في حالة ارتفاع سعر الدولار في مصر بخلاف عمليات المضاربة على السعر في الأسواق الموازية للعملة.
وطول مافيه خلل في المعروض من الدولار هتفضل العملة الخضراء في العالي، والمعادلة دي مش هتتغير غير لما تزيد كمية المعروض من الدولار في سوق الصرف وتوحيد سعره والقضاء على السوق السوداء بشكل نهائى لأنها كول ماهي موجوده هتفضل المضاربة في السعر، ودا متوقع يحصل قريب مع القفزة في إيرادات قطاعات اقتصاديه زي السياحة وقناة السويس والاستثمار المباشر وتقليل فاتورة الاستيراد واللي باستهلاك أغلبية الدولار في البنوك وعائدات برنامج الطروحات الحكومية، ودا بجانب موارد تانية زي تحويلات المصريين بالخارج، غير كده مش هنشوف انخفاض في أسعار الدولار في السوق المصري حتى لو سعر الدولار بره انهار بشكل كبير.
والحقيقة مصر ماشية في اكتر من طريق لتخفيف الاعتماد على الدولار زي الاتجاه للتبادل التجاري مع دول كتير بالعملة المحلية أو عملات دولية بعيدة عن الدولار وما بالتوازي مع رفع قيمة الموارد الدولارية ودا كفيل يحرك أسعار العملة الأمريكية للهبوط بشكل مضمون لأن الموضوع بسيط وبيعتمد على العرض والطلب.