مهزلة في سوق السجاير العلبة وصلت 75 ورئيس الشعبة بيصرخ
اللي بيحصل في سوق السجاير دا مهزلة.. دا مش كلامنا دا كلام رئيس شعبة الدخان والمعسل في الغرفة التجارية وكل اللي قاله حقيقة بتأكد على حالة الفوضى في السوق ولعب التجار في الأسعار من غير تدخل حكومي.. ايه اللي بيحصل في سوق السجاير وليه الحكومة ساكتة لغاية دلوقتي
في أزمة الدولار والدهب حذرنا من تجار الأزمات وانهم سبب مباشر في حالات الغلاء ورفع الأسعار و هرت السوق السوداء للدولار واللي ولعت في الأسعار وخلت سعره يوصل 39و40 جنيه في وقت ذروة الأزمة وفي سوق الدهب ظهر المضاربين وحيتان المعدن الأصفر واللي بسببهم الجرام كان داخل على 3 آلاف جنيه والنهاردة المهزلة بتتمد لسوق السجاير واللي محدش عارف ايه اللي بيحصل فيه.
ابراهيم إمبابي، رئيس شعبة الدخان والمعسل، و مسؤول واكتر واحد المفروض يكون عارف اللي بيحصل في السوق طبع في مداخلة هاتفية على قناة فضائية امبارح وقال ياجماعة اللي بيحصل في سوق السجاير «تهريج»، بنفس اللفظ واتهم الحكومة انها السبب الرئيسي في ارتفاع أسعار السجاير في السوق عشان مش بتدخل وتحاسب التجار إللي بتزود الأسعار من دماغها وحابسة السجاير والناس واقفة عليها طوابير زي طوابير العيش زمان.
و بالنسبة للأسعار الخيالية في السوق وصل سعر علبة كليوباترا بوكس 20 : 24 جنيها فقط وهو الرسمي المعلن من قبل الشركة، وتصل في بعض المحلات إلى 47 و 50 جنيها.
وقال إمبابي إن الزيادة اللي تم عرضها لإضافتها على السجاير كانت لا تتعدى 2 جنيه مش 30 جنيها، طبعا الزيادة الكبيرة دي بتدخل جيوب التجار وليس الدولة، وكشف إن الحكومة أوقفت استيراد التبغ، وأغلقت مصانع بير السلم اللس بتصنع السجائر المضروبة، وأغلى علبة سجاير دلوقتي في السوق سعرها بيوصل لـ75 جنيه ودا زود استهلاك المعسل عشان اتجهت ليه بعد الأسعار الجنونية للسجاير.
وعشان نعرف قد إيه جشع التجار فاق الحدود أسعار السجاير إل إم أحمر اللي بتخرج من الشركة تب 39 جنيه للمستهلك، وصلت بقدرة قادر ل 70 جنيها في بعض المحلات والأكشاك.
طبعا اللي بيحصل دا محتاج تدخل فوري وحاسم من أجهزة الرقابة على الأسعار وحماية المستهلك عشان الأمور ماتخرجش عن السيطرة لأن السجاير رغم ضررها ملايين المصريين مش بيستغنوا عنها
