تطور خطير في أزمة الدولار.. السيسي قالها من زمان

في الكام ساعة الأخيرة حصلت تطورات خطيرة في السوق السودا للدولار في مصر.. تطورات بتقول ان الدولة جادة جدا في وضع نهاية لأزمة نقص العملة والقضاء على السوق الموازية للعملة.. وفيه ارتباك واضح بيسيطر على المضاربين وتجار العملة بسبب كام حاجة تم الإعلان عنها مؤخرا عن مستقبل الاقتصاد المصري وتوقعات سعر العملة الأمريكية قدام الجنيه في الأيام الجاية.. فيا ترى ايه اللى بيحصل ؟ وايه علاقة القلق والخوف اللي مسيطر على السوق السودا بالكلام اللى قاله الرئيس السيسي؟ 
 
أي بلد في العالم بيكون عندها نقص في الدولار عملتها بتتعرض لضغوط كبيرة جدا وقيمتها بتتراجع بشكل ملحوظ وده اللى حصل مع الجنيه المصري في السنة ونص الأخيرة وتقريبا كده الجنيه قيمته قلت بأكتر من 100% وده انعكس على سعر كل حاجة في مصر والحاجة اللى كنت حضرتك بتشتريها ب 100 جنيه وصلت ل 200 و250 جنيه كمان يعنى تقدر تقول الأسعار اتضربت في 3 أضعاف.
ولأن استمرار الوضع ده صعب وليه خطورة على الوضع الاجتماعي واقتصاد البلد.. الحكومة بتحاول بكل الطرق تشوف حل جذري لأزمة الدولار.. في البداية حاولت تعمل ده من خلال الاعتماد على الاقتراض من الخارج والحصول على قرض من صندوق النقد لكن للأسف حصل تعنت من الصندوق وما عرفناش نصرف لحد دلوقتى غير الشريحة الولى من القرض بمبلغ بسيط جدا ما تعداش ال 350 مليون جنيه.. وعشان كده الدولة قررت تلجأ لسيناريو تاني بيعتمد بشكل أساسي على بيع عدد من الأصول المملوكة للدولة وبكده الحكومة هتضرب أكتر من عصفور بحجر واحد.. أولا هتقدر تجمع سيولة دولارية تساعدها في حل أزمة نقص العملة الأجنبية وثانيا هتدي الفرصة اكتر للقطاع الخاص يشتغل ويوفر فرص عمل وكمان تضمن مستوى انتاج أفضل خصوصا وان الصورة الذهنية عن الشركات الحكومية مش ولابد.
وفعلا الحكومة بدأت تنفيذ خطة طروحات كبيرة وجمعت أول 2 مليار دولار من خلال بيع عدد محدود من الشركات والفترة الجاية هتتوسع في بيع عدد تانى .. وده هيوفر سيولة دولارية محترمة 
ومع الأخبار اللى كل يوم بتطلع عن نجاح جهود الدولة في توفير عملة صعبة سعر الدولار في السوق السودا بينهار بقوة لأن معروف ان اى معلومات او بيانات عن توفير دولارات ده بيكون ليه تأثير قوي على السوق الموازية وأسعار العملة المريكية بتتراجع بشكل ملحوظ وان شاء الله الفترة الجاية هتنتهى ظاهرة السوق الموازية بشكل نهائي. 
ولو حضراتكم فاكرين الرئيس السيسي قالها زمان ان أزمة الدولار هتبقا تاريخ زيها زي أزمات كتير مرت بيها مصر وعبرتها .. والرئيس لما أتكلم عن أزمة الدولار كان عارف ان الحكومة شغالة في الملف ده كويس وبتحاول تنهي الفوضى اللى حاصلة في سوق العملة.