البلاك روك وصلت مصر.. غول مالي بـ 10 تريليون دولار
في خبر منشور بيقول إن رئيس شركة بلاك روك وصلت مصر في زيارة للعاصمة الإدارية الجديدة، وكتير جدا من المصريين مخدوش بالهم من أهمية الزيارة لكن المتخصصين وبتوع المال والشركات والبنوك والأعمال عارفين معني الزيارة ايه.. ايه هي شركة البلاك روك وليه هي مختلفة وبتعمل إيه في مصر.
شوف حضرتك البلاك روك دي عاملة زي الديناصور كده حاجة ملهاش مثيل في عالم المال والأعمال وهي أكبر شركة لإدارة الأصول في العالم وعشان تتخيل مدى ضخامتها هي غول مالي بيدير أصول قيمتها 10 تريليون دولار مرة واحدة يعني 10الاف مليار دولار، وبتمتلك أصول بقيمة 265 مليار دولار أكيد حضراتكم اتخيلتوا حجم الشركة دي في العالم.
اللي الخبر الأهم بقي واللي بيقول إن مصر هتكون سابع اقتصاد في العالم في السنين اللي جاية إن البلاك روك قررت دخول السوق المصرية والزيارة الأخيرة لمصر كانت زيارة استكشافية لفرص الاستثمار في مصر ومن الانطباعات الأولى كده باين إنها هتدخل بتقلها، ورئيس مجلس الوزراء الدكتور مصطفى مدبولي اجتمع بمقر مجلس الوزراء بالعاصمة الإدارية الجديدة، مع مسئولي الشركة العالمية، بحضور جوردن فريزر، العضو المنتدب بشركة بلاك روك، وإيميلي فليتشر، مديرة الصناديق بقطاع الأسواق الناشئة في شركة بلاك روك، وكريم عوض، الرئيس التنفيذي لمجموعة هيرميس المالية ودا طبعا بيورينا قد ايه الشركة دي مهمة جدا في العالم واللي تخلي رئيس وزراء مصر شخصيا يستقبله ويشرحله فرص الاستثمار والأعمال في مصر.
الأهم بردوا إن زيارة وفد الشركة العالمية بلاك روك للعاصمة الإدارية الجديدة كان حديث وسائل الإعلام العالمية لأن الزياة بتقول إن الاقتصاد المصري داخل على منعطف جديد من العالمية، ودعاية لاتقدر بثمن للاستثمار في مصر.
وعشان نفهم أكتر البلاك روك دي بتعمل ايه.. فهي معظم فلوسها من خلال إدارة استثمارات العملاء، زي مؤسسات خطط التقاعد وإدارة الثروات والهبات وغيرها من المؤسسات المالية، بجانب استحواذها على الكثير من الشركات المنافسة وتكثيف استثماراتها في شركات ناشئة في مجال التكنولوجيا المالية.، عشان تضمن تتفوق على كل منافسيها.
واستحوذت بلاك روك على شركات ضخمة حول العالم منها مثلا شركة الاستثمار البريطانية الشهيرة باركليز في سنة 2009 وقبلها ب3 سنين استحوذت على شركة التمويل العالمية ميريل لينش.
بلاك روك أكبر شركة لإدارة الأصول في العالم، وبتصل الأصول الخاضعة للإدارة 10 تريليون دلاور بأرقام يناير 2022، وليها 70 مكتب في 30 دولة وعملاء في 100 دولة.
