هو فعلا الحكومة هتقدر تجمع 191 مليار دولار في سنتين
الدكتور مصطفى مدبولي أكد في مؤتمر صحفي إن الحكومة هتجمع 191 مليار دولار في خلال سنتين تلاتة ودي مدة صغيرة جدا على المبلغ الضخم دا خصوصاً لو عرفنا أن أي ايرادات مصر النهارده حققت 94.5 مليار دولار خلال 2022 مقابل 89.2 مليار دولار في 2021 .. ياترى الحكومة تقدر تجمع المبلغ دا اللي أعلن عنه مدبولي وإزاي.
رئيس الحكومة طلع وقال إنه مستهدف ايرادات الدولة من الدولار توصل 191 مليار دولار حتى 2026 أو خلال سنتين تلاتة زي ماقال مدبولي ووضحها بالأرقام إنه مستهدف تحقيق 88 مليار دولار صادرات سلعية و45ت من حويلات المصريين بالخارج و20 مليار دولار من السياحة و17 مليار دولار قناة السويس والخدمات البحرية واللوجستية و9 مليار من التعهيد.
بأرقام ومؤشرات نهاردة نقدر نقول إن الدولة المصرية قادرة تحقق اكتر من المبلغ دا بكتير لأن كل القطاعات الاقتصادية منطلقة وفيه خطط موضوعة للقفز بالايرادات الدولارية في كل قطاع لغاية 2030 حتى من قبل أزمة روسيا الأخيرة ومستهدف مثلا 100 مليار دولار صادرات و30 مليار دولار من السياحة وكمان لازم ناخد بالنا من حاجة مهمة إن احصائيات الدكتور مدبولي مكانش فيها أي ايرادات الاستثمار المباشر واللي حقق حاليا 12 مليار دولار تقريبا ومستهدف وصوله لاكتر من 50 مليار دولار في كل القطاعات الواعدة للاستثمار زي الاستثمارات والمشروعات في المناطق الاقتصادية ومنطقة قناه السويس الاقتصادية وغيرها من الإيرادات.
كمان مدبولي محسبش الفرق في انخفاض قيمة فاتورة الاستيراد والواردات مع خطة توطين الصناعة في مصر وكمان التوسع في الخدمات اللوجستية والموانئ واللي طلع كامل الوزير وزير النقل وأكد إن أي إيراداتها هتعدي إيرادات السياحة وهتجيب اكتر من 20 مليار دولار في الكام سنة اللي جايين.
كل الارقام اللي فاتت بتأكد إن رئس الحكومة قال رقم أقل من التوقعات وانه اتكلم في المضمون من الحد الأدنى للإيرادات الدولار لكن المبلغ اكبر من كده بكتير وممكن بحسب بسيطة يعدي ال250 مليار دولار.
