البنك المركزي أعلن عن قواعد ترخيص البنوك الرقمية.. يا ترى اية هي؟ ومفيدة في اية؟

بعد إصدار البنك المركزي المصري قواعد ترخيص البنوك الرقمية هاتعرف في الفيديو اية هي البنوك الرقمية وأية فايدتها؟؟

ببساطة كدا.. البنك الرقمي عبارة عن بنك بيقدملك كل 
الخدمات المصرفية من خلال القنوات أو المنصات الرقمية باستخدام التقنيات التكنولوجية الحديثة.

يعني تقدر من خلال البنك الرقمي تاخد قرض وتشتري شهادة وتعمل إيداع وكل دا.. إحنا دلوقتي في ظل تحول رقمي.. يعني أغلب المعاملات البنكية بتتعمل من خلال التليفون أو التقنيات التكنولوجية الجديدة.. بس في شوية حاجات أنت بتعملها من خلال الفروع البنكية.. دلوقتي تقدر تعملها من خلال البنك الرقمي.

ومن مميزات البنوك الرقمية أنها بتوفر الوقت والجهد فالبنوك الرقمية بتتيح الخدمات لعملائها دون الحاجة للذهاب للفرع.. وكمان البنك الرقمي مش محتاج عمالة كتير وبيقدر يجذب أكبر قدر من العملاء لأنك تقدر تشترك فيه وأنت في بيتك.

البنك المركزي بقى حط قواعد لترخيص البنوك الرقمية

واللي على رأسها أن البنك يقدر يبدأ في تنفيذ عملياته البنكية لما يكون الرأس المال المخصص له ٢ مليار في حالة ممارسة كافة أعمال البنوك، باستثناء تمويل الشركات
الكبرى، لأن دا محتاج رأس المال يصل إلى 4 مليار.

وكمان لازم في البنك الرقمي يكون المساهم الأكبر فيه مؤسسة مالية ليها سابقة أعمال في أنشطة مماثلة بنسبة لا تقل عن 30% من إجمالي قيمة رأس المال.

لازم كمان البنك اللي عايز يعمل بنك رقمي يقدم دارسة جدوى مفصلة تتضمن تحديد الشرائح المستهدفة والمنتجات المخطط إتاحتها، وكذلك خطط تكنولوجيا المعلومات، وخطط واستراتيجيات الأمن السيبرانى.

خلو بالكم، البنوك الرقمية بتخضع لنفس القواعد والضوابط الخاصة بالرقابة والإشراف المطبقة على البنوك العاملة بجمهورية مصر العربية.

طبعا القرار دا بيفتح قدام البنوك أنها تنفذ بنك رقمي.. وبالمناسبة بنك مصر خد خطوات استباقية من خلال إنشاء شركة مصر للابتكار الرقمي ككيان مستقل للعمل على تنفيذ البنية التحتية للبنك الرقمي، وكمان البنك الأهلي وبنوك خليجية دخلت السبق علشان تاخد رخصة عمل بنوك رقمية.