إلغاء الجنيه المصري.. تفاصيل العملة الجديدة للبريكس

 مصر زيها زي اي دولة بتدور على مصلحتها وتشوفها فين وتمشي وراها ايا كانت الظروف وحالة الاستقطاب الدولي ولأن مصر دولة كبيرة وإقليمية وليها وضعها في العالم أي خطوة بتاخدها بتسمع في العالم كله وكان آخرها طلب القاهرة الانضمام  رسميا لتجمع دول بريكس وكلنا عارفين إن دا تجمع دولي جديد بتقوده روسيا والصين والهند وجنوب أفريقيا وبيمثل كيان صاعد جديد وهدفه بناء تعاون اقتصادي ومالي وتجاري بين الدول الأعضاء ومواجهة الدولار والهيمنة الأمريكية على اقتصاد العالم والبريكس فكرة قديمة جدا لكن تم الإعلان عنها رسميا بعد توحش الدولار واستخدامه في العقوبات الامريكيه على الصين وروسيا.. وللبريكس ذراع مالي وهو بنك التنمية الجديد ودا مصر انضمت ليه رسميا قبل كده وهدفه مساعدة الدول الأعضاء في التمويل المالي بعيد عن مؤسسات المانحة التانية ومن بين أهداف بريكس الأساسية اعتماد عملات الدول الأعضاء في المجموعة في التعاملات التجارية بعيدا عن الدولار وفي مقترح قوى بإنشاء عملة موحدة بدول البريكس زي اليورو الأوروبي واللي بقى بديل للعملات الأوربية زي الجمارك الألماني والفرنك الفرنسي وغيرها من العملات واللي اليورو لغتها كلها.. ياترى لو البريكس عملت عملة موحدة زي اليورو ايه هو مصير الجنيه المصري. والعملات المصرية وهل ممكن مصر تتخلى عن عملتها.
 
شوف حضرتك  أوروبا كلها مكانتش مصدقة إنه هيبقي فيها عملة موحدة ودا لأن العملات الأوربية الشهيرة كانت قديمة جدا وقوية لكن حصل واليورو ظهر في أول يوم من 1999 وبقى العملة الموحدة في أوروبا بخلاف الاسترليني بسبب خروج بريطانيا من الاتحاد الأوروبي... والقصد إن مصلحة الدول هي اللي بتحكم فيي النهاية والنتيجة اليورو الأوروبي من اقوى عملات العالم ودا معناه قوة كل الاقتصاديات الأوربية.

لكن نرجع لقصة بريكس والعملة الموحدة المقترحة.. وهنقول لحضراتكم إن أي قرار اقتصادي خطير في أي كيان بيتم دراسته بشكل عميق جدا وبياخد وقت وترتيبات كتيرة وظروف تكون مهيأة وخاصة في موضوع العملة الموحدة دا لأن فيه تفاصيل كتير لازم تتنفذ أولها إن الدول الأعضاء تكون اقتصادياتهم متقاربة من حيث النمو والناتج المحلي زي ما حصل في أوروبا وظهور اليورو وغير كده يبقي العملة الجديدة هتقابل مشاكل كتير وأكيد قادة البريكس عاملين حساب ده وأكيد هتكون فيه خطط للنهوض باقتصاديات الدول الأعضاء عشان تكون قريبة من بعض وما يحصلش أي أزمة كبيرة.

وفيه مقترح تاني بديل للعملة الموحدة وهو إن الدول الأعضاء تحتفظ بالعملة الوطنية بتاعتها في معاملاتها التجارية والمالية مع بقية دول العالم خارج بريكس ويتم إصدار عملة مشتركة للتعامل بيها بين أعضاء بريكس يعني الدولة العضوة في المجموعة هيكون معاها عملتين العملة بتاعها زي الجنيه عندنا وعملة تانية للبريكس تتعامل بيها مع زميلها في المجموعة.. وأيا كان نوع وشكل وتوقيت اصدار عملة بريكس الموحدة موضوع التخلي عن الجنيه كعملة مصرية هتحدده الظروف ساعتها ومدى استفادة مصر من البريكس وعملتها الموحدة وحسابات تانية كتيرة ممكن تاخد سنين عشان تتطبق.