قرار من وزارة التموين هيعمل انقلاب في سوق الدهب

اللي متابع سوق الدهب كويس هيعرف ان اصحاب محلات الصاغة كانوا طول الفترة اللى فاتت بيشتكوا من اقبال المصريين على السبايك والجنيهات الدهب وما بقوش يشتروا مشعغولات دهبية كتير زي الأول يعنى مثلا قليل اوي لما تلاقي حد بيشترى غويشة او خاتم أو سلسلة أو انسيال وده لأن المصنعية على المشغولات عالية جدا عكس السبايك والجنيهات اللي مصنعيتها أقل بكتير.. ومؤخرا الجريدة الرسمية نشرت قرار لوزارة التموين في الموضوع ده هيعمل انقلاب حرفيا فى سوق الدهب .. فيا ترى ايه القرار ده ؟ وتأثيره على اسعار الدهب ايه الفترة الجاية؟
  الوقائع المصرية، نشرت  قرار وزارة التموين والتجارة الداخلية رقم ٩٤ لسنة ٢٠٢٣، بشأن تعديل بعض أحكام اللائحة التنفيذية لقانون الرقابة على المعادن الثمينة والأحجار ذات القيمة الصادرة بقرار وزير التموين والتجارة الداخلية رقم ١٠٧ لسنة ٢٠٠٢.
ووفقا للتعديل ده هيتم اعتبار السبائك الـ 100 جرام فأقل "مشغولات دهبية" يعنى حضرتك لو رحت اشتريت سبيكة وزنها 20 او 30 او 40 أوحتى 100 جرام هتدفع عليها مصنعية زيها زي اى غويشة او سلسلة يعنى الميزة اللى كانت فى السبايك وبتخلى الناس تشتريها عشان ما تدفعش كمصنعية كبيرة خلاص مش هتبقا موجودة فى غير السبايك الأعلى وزنا من 100 جرام. 
وفي المادة الأولى للقرار نص على أنه تُضاف مادة جديدة برقم (١ مكرر) للائحة التنفيذية للقانون رقم ٦٨ لسنة ١٩٧٦، بشأن الرقابة على المعادن الثمينة والأحجار ذات القيمة الصادرة بقرار وزير التمـوين والتجارة الداخلية رقم ١٠٧ لسنة ٢٠٠٢؛ نصها الآتي:
مادة (١ مكرر):
يقصد بالعبارات والألفاظ التالية المعنى المبين قرين كل منها:
مصدر الخام: هو كل مستخرج من أحد العناصر الطبيعيـة يحتـوى على معادن ثمينة أو أحجار ذات قيمة.
خام المعدن الثمين أو الحجر ذو القيمة: هو كل قطعة غير متجانسة من معدن ثمين أو كل قطعة غير مشكلة من حجر ذي قيمة مستخلصة من مصدر الخام.
السبائك: هي كل قطعة متجانسة غير مشغولة من معدن ثمين بدرجة نقاء محددة يزيد وزنها على مئة جرام أيًّا كان شكلها أو حجمها. وتعتبر السبائك التي تزن ١٠٠ جرام فأقل مشغولات ذهبية أو فضية أو بلاتينيـة حسب المعدن الثمين المعدة منه.
الأصناف نصف المشغولة: وهي كل منتج من معدن ثمين مطابق لأحد العيارات القانونية المنصوص عليها في القانون رقم ٦٨ لسنة ١٩٧٦ المشار إليه يـدخل عليـه عملية تصنيع أو أكثر.
الأصناف غير المشغولة: وهي كل قطعة تحتوي على معدن ثمين معد للاستخدام في الأغراض الصناعية
وحرفيا القرار الجديد ده هيعمل قلبان فى سوق الدهب لأن كتير من الناس كانوابيختاروا السبايك عشان يقللوا هامش الخسارة فى المصنعية اللى بتضاف على سعر الجرام واللى بتوصل احيانا لأكتر من 100 جنيه حسب نوع المشغولات.