هو صحيح الدولة بتشتري الدولار من السوق السوداء
في مصر كل ماحد يتكلم عن أزمة الدولار والسوق السوداء يقولك الحكومة نفسها بتشتري الدولار من السوق السودا وبأسعار كبيرة وواحد تاني يطلع يجود ويقولك على. فكرة الحكومة هي اللي رافعة سعر الدولار في السوق السودا عشان بتشتري بكميات كبيرة وعشان كده بتحصل مضاربة.. ايه حقيقة الكلام وهل صحيح الحكومة أو وزارة المالية أو البنك المركزي بتتعامل مع السوق السودا للدولار.
في البداية خلينا نأكد إن مش ممكن الدولة تتعامل مع سوق ممنوعة قانونا وخاصة لو سوق العملة بدليل بسيط جدا إنه لو الدولة بتتعامل مع السوق السودا كان زمان أزمة الدولار اتحلت والمالية المركزي مكنوش يتعبوا نفسهم ليل نهار عشان يلاقوا حل لأزمة نقص العملة الأمريكية ولأن مصر دولة محترمة مستحيل تتعامل مع كيان بيتسغل ظروف البلد وبيطعنها في ضهرها وكل اللي يهمها المكسب.
وعشان نفهم فلوس السوق السوداء للدولار بتروح فين لازم نعرف مين هما عملاء أو زباين السوق السودا واول زبون هما المضاربين نفسهم واللي بيكسبوا من فرق السعر وبيولعوا الأسعار وتاني فئة بتتعامل مع السوق السودا هي فئة الناس اللي بتشتري الدولار عشان تخزنه للزمن لكن مش بتضارب بيه بشكل مستمر زي اي حد كده ما يروح يشتري دهب ويشيله للزمن وتفكير الفئة دي إنه يستثمر في الدولار لأنه شايف إنه بيحافظ على سعره وبيزيد دايما قدام الجنيه أما الفئة التالتة واللي بتتعامل مع سوق الدولار السودا هي أصحاب الشركات والأعمال واللي بيعتمدوا على الاستيراد وعايزين يدخلوا بضايعهم فبيروحوا السوق السودا ويشتروا بكميات كبيرة وفي الاخر بيعوضوا فرق السعر من رفع سعر البضاعة بتاعتهم بالجنيه المصري وهنا المواطن أو المشتري هو اللي بيحاسب على الفاتورة .
طيب الدولة بتجيب الدولار منين لو الدولار الرسمي وهل ممكن تاخد أو تشتري من شركات الصرافة وهي شركات رسمية وشغالة في النور.. الإجابة حضرتك بردوا لأ.. لأن شركات دور شركات الصرافة في أى دولة في العالم هو تحويل العملة للعملاء الأفراد وخاصة السائحين القادمين من دول تانية ومحتاجين باستمرار لتحويل عملاتهم الأجنبية إلي مصرية أو العكس ، يعني ببساطة مفيش غير البنوك المحلية هي المسؤلة عن تدبير الأموال اللازمة للعمليات التجارية لأنها بتحتاج أموال ضخمة بالدولار.
وباختصار المركزي بيجيب الدولار من القنوات الرسمية للدولة وهي حصيلة قطاعات الاقتصاد اللي بيجيب دولار زي قناة السويس والتصدير وتحويلات المصريين في الخارج والاستثمار المباشر والقروض الخارجية والودايع والسندات وطرق تانية كتير بعيد عن أي نشاط مشبوه.
