سر غضب السيسي من اللي بيحصل؟.. وهل الجنيه يقدر فعلا يصمد قدام الدولار؟
من كام يوم الرئيس السيسي كان بيزور الاسكندرية واتكلم عن الأزمة الاقتصادية اللى بتعاني منها مصر وقال ان الي بيحصل من ارتفاعات كبيرة فى اسعار السلع مش هيتوقف الا لو قدرنا نسد الفجوة التمويلية الموجودة فى الموازنة العامة.. الرئيس انفعل جدا واتلكم بغضب عن ملف مرونة سعر الصرف وقال ان مصر بتطبق سعر مرن لكن لو ده هيأثر على حياة المصريين فمش هيحصل فى اشارة لرفض مصر مطالب صندوق النقد الخاصة بتخفيض قيمة الجنيه من جديد.. فيا ترى ايه سر غضب السيسي ؟ وليه لوح بعدم الاستجابة لمطالب الصندوق؟ وهل الجنيه فعلا قادر على الصمود فى مواجهة الدولار؟
صندوق النقد الدولى لما بيقرض أى دولة فى العالم بيطلب منه 3 حاجات رفع سعر الفايدة وتطبيق سعر مرن لصرف العملة بتاعتها قدام العملات الأجنبية، وكمان خروج الدولة من الاقتصاد وتوسيع حجم مشاركة القطاع الخاص فى الناتج المحلي، ومصر حاليا نفذت أغلب طلبات الصندوق يعنى مثلا سعر الفايدة اترفع بحوالى 10% من مارس 2022 ولغاية دلوقتي وتقريبا فى كل اجتماع للجنة السياسة النقدية فى البنك المركزي كنا بنشوف قرار برفع اسعار الفايدة لمواجهة التضخم ووقف جنون الأسعار.. ومصر كمان طبقت سعر صرف مرن للجنيه المصري وده أدى الى هبوط قيمة العملة المصرية بحوالى 100 % في مقابل الدولار الأمريكي وعملات تانية كتير.. وفيما يتعلق بدعم القطاع الخاص فالدولة حاليا بتتبنى خطة لزيادة مساهمة القطاع الخاص فى حجم الناتج المحلي.. يعنى تقريبا كده الحكومة ما قصرتش فى حاجة وعملت كل اللى عليها فى اتفاقها مع صندوق النقد ورغم كده المسئولين فى الصندوق طلباتهم ما بتخلصش ومصممين ان مصر تخفض قيمة عملتها تاني رغم ان رئيس الحكومة بنفسه الدكتور مصطفى مدبولى طلع فى تصريحات رسمية وقال ان الجنيه مقوم بأقل من سعره العادل بسبب أزمة نقص العملة الأجنبية وقال ان الحكومة شغالة على سد الفجوة الدولارية وان ده هيقوي قيمة الجنيه.
والرئيس السيسي كان منفعل وغضبان فى كلامه الأخير عن مرونة سعر الصرف لأنه شايف ان الصندوق متحامل على مصر وليه طلبات مش منطقية وممكن تأثر على حياة الناس وده موضوع أمن قومي مفيهوش هزار وده اللى قاله السيسي بنفسه .. لما أكد ان لو تطبيق سعر صرف مرن هيأثر على حياة الناس مش هنعملوا حتى لو هيتعارض مع طلبات الصندوق
طب يا ترى الجنيه فعلا هيقد يصمد قدام الدولار؟
تقارير المؤسسات الدولية اللى كانت بتتكلم عن خفض جديد فى قيمة الجنيه تراجعت ومعظم المؤسسات دلوقتى بتقول ان مفيش اى تخفيض هيحصل في العملة المصرية على الاقل لغاية شهر 9 الجاي، وده بعد ما الضغوط على الجنيه تراجعت وبدأ يحصل تحسن فى قطاعات مهمة زي السياحة وارتفاع حجم الصادرات وبدء تنفيذ برنامج الطروحات الحكومية
يعنى من الآخر مصر بدأ يتوفر عندها سيولة دولارية تغطي احتياجاتها وده عمل استقرار كبير فى السوق وانعكس على سعر الدولار اللى بيشهد استقرار فى البنوك بقاله اكتر من 3 شهور
طب وبالنسبة للسوق السودا ؟
السوق السودا بقا فيه معركة ضخمة والبنك المركزي بيقود تحركات قوية لانهاء السوق الموازية بأى شكل من الاشكال وفى الايام الاخيرة فيه انهيار كبير فى سعر العملة الأمريكية بعد تصريحات الرئيس السيسي بعدم وجود تخفيض فى قيمة الجنيه وناس كتيرة من اللى معاها دولارات بدأت تطلعها وتعرضها للبيع والاسعار نزلت من 42 جنيه الى مستويات من 36 الى 38 جنيه ومتوقع هبوط جديد كمان الأيام الجاية
طب هل فيه شواهد تانية عن استرداد الجنيه لجزء من قوته ؟
فيه أكتر من شاهد أولهم اللى بيحصل فى سوق الدهب والانخفاض الكبير فى الاسعار وكفاية تعرف ان جرام الدهب عيار 21 فقد أكتر من 600 جنيه من سعره مرة واحدة وبعد ما وصل سعر الجرام الى 2850 بيباع حاليا فى حدود 2250 جنيه ، ده بالاضافة لانخفاض اسعار سلع مهمة زي الرز اللى سعره انخفض بأكتر من 10 جنيه وحالبيا الكيلو بيباع ب 20 جنيه بعد ما عدا ال 30 جنيه.
