صدمة السوق السوداء للدولار بعد ضربة الرئيس القاضية.. الانهيار قادم

كل مصر ووسائل الإعلام المصرية والعالمية سمعت وشافت الرئيس السيسي وهو بيتكلم امبارح عن تفاصيل واسرار الأزمة الاقتصادية وأزمة الدولار والتحديات اللي بتواجه البلد وكلامه عن أولويات الحكومة المصرية لحماية الأمن والسلام الاجتماعي غير كلام تاني مهم جدا.. بس الحقيقة مش بس المصريين العاديين وحدهم اللي تابعوا كلام الرئيس لأنه كان فيه ناس تانية سمعت كلام الرئيس خاصة عن الدولار والجنيه وتقريبا جتلهم جلطة وسكتة قلبية.. مين الناس دول وليه الرئيس قضى على أحلامهم مرة واحدة
 

إنهيار السوق السوداء

رئيس الجمهورية امبارح جاب سيرة الدولار والجنيه المصري وأزمة فرق السعر واللي بيرهق الحكومة جدا في مشتريات السلع والخدمات اللي بتستورد من بره وفي وسط الكلام قال الرئيس فيما معناه إنه مفيش تحرير لسعر الجنيه في الوقت الحالي أو تعويم عشان تبعاته هتبقى خطيرة جدا على الدولة، واللي فسره أهل الاقتصاد بأنه رفض ضمني لشروط صندوق النقد الدولي واللي كان مشترط خضوع الجنيه للسعر المرن وتركه لمصيره بين العملات.

تجار العملة في قبضة البنك المركزي

طبعا كلام الرئيس كان صدمة لتجار العملة وحيتان السوق السوداء للدولار في مصر واللي بنوا أحلامهم على التعويم وارتفاع سعر الدولار في الأيام الجاية لكن تصريحات الرئيس ضيعت كل أحلامهم مرة واحدة لأن الجنيه هيفضل مستقر قدام الدولار فترة كبيرة وفي نفس الوقت الإيرادات الدولارية في البلد بتزيد بشكل كبير سواء من القطاعات الطبيعية زي التصدير وقناة السويس والتحويلات والسياحة والاستثمار المباشر أو من خلال الودائع البنكية واللي زادت مليار و700 مليون دولار من كام شهر أو ارتفاع ايرادات الدولار من برنامج الطروحات الحكومية والاخبار الحلوة بتقول إن كل موارد الدولار هتزيد بشكل كبير ودا واضح من كل البيانات الرسمية في مختلف القطاعات.

خلاص مفيش تعويم 

كل البيانات دي بجانب قرار الرئيس السيسي والحكومة بعدم التعويم تاني وارتفاع حصيلة الدولار المتوقعة سبب صدمة عند تجار الدولار ولو تابعنا اخبار السوق السوداء دلوقتي فهي عاملة زي راجل كبير في السن وكفيف وماشي بيتخبط في الشارع وفيه زي صدمة شديدة عند كل اللي تاجر وخزن الدولار لأن خسارته بالملايين والارقام اللي جاية بتقول إن فيه انهيار في سعر الدولار بالسوق السوداء واللي نزل لأقل من 35 جنيه ولسه هينزل تاني بعد كلام الرئيس وتجار العملة دلوقتي مش عارفين يعملوا ايه ومفيش حل قدامهم غير يتخلصوا من المبالغ اللي معاهم قبل خسارتهم ماتزيد ولازم يدخلوها السوق الرسمي تاني وغير كده خد عندك الدولة شادة حيلها اووي اليومين دول على تجار العملة وكل يوم بنسمع عن ناس وقعت في أيدين الأجهزة يعني السوق السودا بتتخنق كل يوم اكتر من التاني.

توافر الدولار 

بجانب القرار الصدمة للرئيس في سبب تاني مهم جدا لانهيار السوق السوداء للدولار وهو توافر الدولار مع الشركات والجهات اللي محتجاه وبالتالي مش مضطرين يروحوا يشتروا الدولار من السوق السودا ودا اللي قاله تقرير دولي مهم جدا صادر عن بنك عالمي واللي أكد إن مصر معندهاش أزمة في نقص الدولار وإنه متوفر لكن بعيد عن البنوك الرسمية ودا بيخلق زي حالة تشبع من العملة الأمريكية بعيدا عن السوق السوداء واللي هتنهار  اكتر الأيام الجاية.