الجنيه جاب جون في الدولار .. إيه حكاية الاستثمار العكسي والتحويلات ضخمة في الطريق

عندنا في مصر مشكلة كبيرة وهي إن الناس بتابع بس الاخبار  اللي فيها أزمة ومش يتركز على الايجابيات والمؤشرات البعيدة اللي بتأكد إن بكرة هيكون أفضل ألف مرة من النهاردة وإن الأزمات الحالية مسألة وقت وهتبقى فعلا ذكري وأمكن دي مشكلة الحكومة انها مش بتشرح للناس بالتفصيل اللي بيحصل في الشأن الاقتصادي.. احنا هنشرحلكم إزاي الاقتصاد المصري عفي وقوي واللي جاي كله خير ومليارات رغم الأزمة الحالية.

 
في الأول هنعترف بالأزمة الحالية بتاعة الدولار رغم إن فيه تقارير مفاجئة طلعت وقالت إن مصر معندناش نقص دولار وقال إن البلد فيها دولارات لكن مش بتدخل للقطاع المصرفي أو البنوك لكن مع المواطنين والشركات وإن الدولارات دي دخلت البنوك سعر الدولار هينزل لسعره الطبيعي لكن خلينا نلفت انتباهكم أن قوة الدولة الاقتصادية بتعتمد على مواردها من العملة والتنوع في الموارد دي ومصر بفضل الله عندها تنوع فريد في اقتصادها واكتر من مورد زي قناة السويس والسياحة والتصدير والخدمات اللوجستية وتحويلات المصريين والاستثمار المباشر والاستثمار العكسي.

ممكن حضرتك اول مرة تسمع مصطلح الاستثمار العكسي لكن الحقيقة هو دا اللي هيحل أزمة العملة الأجنبية في مصر وهيوفر الدولار .. طيب ايه هو الاستثمار العكسي.. هو حضرتك إن الشركات المصرية والخاصة تشتغل بره وتستثمر إمكانياتها في أسواق خارجية في كل القطاعات والصناعات والمجالات زي الصناعة والانشاءات والخدمات زي اللي بتعمله اوراسكوم والسويدي وقبلهم المقاولين العرب في افريقيا وغيرها من القارات وعملت وبتعمل مشروعات بمليارات الدولارات زي مشروع سد تنزانيا والمنشآت الحكومية في دول افريقية كتيرة هتقولي الحكومة المصرية هتكسب ازاي .. هقولك لحضرتك أن الشركات دي أما بتكون حكومية زي المقاولين العرب او الحكومة ليها نسبة في مكاسب المشروع من الشركات الخاصة لأن المشروعات دي بتيجي باتفاقيات بين مصر والدول دي.
عشان نعرف أهمية الاستثمار العكسي مصر أو الشركات المصرية وقعت عقود بحوالي 77 مليار دولار لإعادة الإعمار في ليبيا ودي مئات الشركات المصرية الحكومية والخاصة هتنفذها يعني إيرادات لخزينة مصر دا غير ملايين العمالة اللي هتستفيد من فتح السوق الليبي ومشروعات الإعمار.

زي ما حصل في ليبيا بيتكرر في العراق واللي الشركات المصرية هتنفذ مشروعات عملاقة في إعادة الإعمار وامبارح وصل مصر رئيس الوزراء العراقي محمد شياع السوداني، لمرة الثانية خلال نحو 100 يوم، لتعزيز العلاقات الاقتصادية والتجارية بين بغداد والقاهرة، والاستفادة من الخبرات المصرية في مشروعات إعادة الإعمار.

وعشان نعرف أهمية الزيارة فرئيس وزراء العراق جاي ومعاه وفد من  12 وزيراً من مختلف الوزارات الخدمية والأمنية، إضافة إلى عدد من رجال الأعمال العراقيين للقاء نظرائهم من المصريين يعني جايب الحكومة العراقية كلها.
وحصل بالفعل توقيع 10 اتفاقيات في مجال إعادة الإعمار  ولما السوداني اتسأل اشمعنا مصر هتفوز بكحكة إعادة الإعمار وهي بمليارات الدولارات قالهم عشان مصر الوحيدة اللي مكنتش طمعانة في العراق واكتر دولة حاولت عشان العراق يوقف على رجليه ويخرج من دايرة الدم والحرب وكمان عشان مصر عندها إمكانيات اقتصادية وشركات عالمية تقدر تنفذ المشروعات.
موضوع العراق مهم جدا كمان في استيعاب ملايين المصريين للعمل هناك ولو متعرفش زمان كانت العراق أفضل من دول الخليج بالنسبة للأجر وكمان هيحصل طفرة في تحويلات المصريين في العراق وليبيا.
القصد أن الاستثمار العكسي هو مستقبل مصر بجانب تنامي قوة مصر الاقتصادية في كل المجالات وارتفاع حصيلة كل الموارد الدولارية ودا هيعزز قوة الجنيه المصري في الشهور الجاية.