قرار صادم من شركات المحمول خلال أيام .. هترفع خدماتها

 معروف  إن مصر أكتر دولة في المنطقة تضررت بسبب الصراع الروسي الأوكراني لأننا ببساطة أكبر مستورد للحبوب من الدولتين وكمان على مستوى السياحة هما يعني روسيا وأوكرانيا اكبر موردين للسياحة المصرية ودا سبب نقص شديد في الدولار بسوق الصرف بجانب أسباب تانية كتير منها خروج مليارات الدولارات من السوق المصري أو الأموال الساخنة زي ما بيسموها وزي ما الدولة اتأثرت كاقتصاد كمان الشركات العاملة في مصر اتأثرت جدا بسبب فروق سعر الصرف وانخفاض قيمة الجنيه للنص وخاصة الشركات اللي بتعتمد على مكون دولاري في أنشطتها عشان تستورد بيه ادوات الإنتاج والمعدات التكنولوجية المتقدمة زي شركات المحمول في مصر واللي اتأثرت بشدة واتاكلت أرباحها مع ارتفاع سعر صرف الدولار... فيه كلام وتقارير بتأكد على خطوة مش سارة لعملاء شركات المحمول وأنها قررت ترفع اسعار الخدمات بشكل كبير في الأيام الجاية وإن القرار خلاص على وشك الصدور رغم عدم تأكيد اي مصدر رسمي في جهاز تنظيم الاتصالات واللي هو الجهة المشرفة على شركات المحمول.. ايه إللي هيحصل في الأيام الجاية ولو فيه زيادة هتبقي كام وهي فعلاً شركات المحمول بتخسر

فيه تقرير طلع من شوية نشرته الشرق بلومبرج بيقول أو بيأكد إن شركات المحمول في مصر في طريقها  لزيادة أسعار كافة الخدمات اللي بتقدمها بنسبة تصل إلى 30%، مع تآكل هوامش ربحيتها وده بسبب ارتفاع التضخم وتراجع العملة المحلية، بحسب مصادر مطلعة زي ماقالت الوكالة.

شركات المحمول المحمول معروف إنها بتعتمد على العملة الصعبة أو الدولار في استيراد مستلزمات أساسية زي أجهزة ومعدات الاتصال والشبكات ودي يظهر إنها معدات غالية اووي  وقال التقرير إن شركات المحمول، اتقدمت فعلا بطلبات لزيادة الأسعار لكن لسه مفيش قرار نهائي  لكن مصادر أكدت للشبكة إن القرار والتطبيق هيكون خلال ايام، وقبل موسم إجازات الصيف.

حسب التقرير الزيادات هتطول كل الخدمات المقررة من  جهاز تنظيم الاتصالات وإن الشركات ركزت في طلبها على تأثرها بتراجع سعر الجنيه مقابل الدولار وزيادة التكلفة وفيه مسؤول بإحدى شركات الاتصالات في مصر قال إن هامش الربح بيتآكل في الشركات ومفيش مفر من رفع الأسعار، وأكد أن الشركات فشلت حاولنا في التحكم بهوامش الربحية من خلال تقليل النفقات لكن في النهاية أصبح تعديل الأسعار حتمي وضروري على الشركات واتوقع المسؤول إن الزيادة مش هتقل عن 10% ومش هتزيد عن 30% وأكد كمان إن  متوسط سعر دقيقة المحمول في مصر الأرخص في الشرق الأوسط والمنطقة كلها وإن الزيادة مهمة عشان الشركات تكمل.
رسميا مفيش رد من جهاز تنظيم الاتصالات على التقارير المنشورة بتاعة رفع خدمات المحمول في الفترة الجاية ولو فيه اي قرار فأكيد هيعلن خلال أيام حسب التقارير.

وللتذكير في مصر 4 شركات لخدمات  المحمول، هي "فودافون مصر" التابعة لمجموعة "فودافون" البريطانية، و"أورنج مصر " التابعة لمجموعة "أورنج" الفرنسية، و"اتصالات مصر" التابعة لـ"اتصالات" الإماراتية، و"المصرية للاتصالات" الحكومية، وتمتلك "المصرية للاتصالات" حصة 45% من أسهم "فودافون مصر". و "المصرية للاتصالات"، المشغل الوحيد للخدمات الأرضية والشركة الوحيدة المدرجة في البورصة المصرية سبق وقالت إنها تكبدت خساير فروق عملة بلغت 4.581 مليار جنيه في الربع الأول من 2023 على أساس سنوي مقابل 1.445 مليار قبل عام.