ليه المصريين مش أغنياء وثروات مصر بتروح فين؟
في مايو اللي فات احتلت 3 دول عربية ترتيب متقدم في تقرير نشره موقع "Insider Monkey"، معتمد على بيانات لتقرير بنك "كريدي سويس" حول ثروات الأمم الصادر في سنة 2022، والذي جمع بيانات الدول حتى 2021. ، واعتبر التقرير إن مصر واحدة من أغنى دول العالم، وصنفها في المرتبة 32 عالمياً بصافي ثروة تزيد على 1.4 تريليون دولار وقبل الامارات بكتير واللي جت في المركز 37.. طيب هنا يطلع سؤال منطقي ليه المصريين كمواطنين مش أغنى زي الإماراتيين والسعودين وإمتي المصريين كلهم يبقوا أثرياء وتنتهي المشاكل الاقتصادية.
مصر حقيقي ثرواتها كدولة أكتر من الإمارات العربية كتير لكن فيه فرق بين ثروات الدول والأداء الاقتصادي والاستثماري وعدد السكان فيها.. يعني زي واحد معاه أراضي كتير وفلوس بس تحسه عايش في دائرة أزمات وفقر، أو مش عارف يستغل الثروة دي أو إن فيه خلل كبير في التوزيع السكاني وهنا تحديدا مشكلة مصر عدد السكان الضخم واللي بيزيد كل ثانية ودقيقة كأعلى معدل مواليد في العالم وحسب أخر احصائيات وصل سكان مصر جوه البلد 105 مليون نسمة وبنزيد أكتر من مليون في السنة عشان كده الدولة والشعب مش عارفين يستغلوا عائد التنمية والنمو الاقتصادي.
وضعنا بالظبظ وعشان نبسطها لحضراتكم زي موظف وظيفته كويسة ومرتبه كبير وعايش مستمتع بيه وبيسافر ويتفسح وبيعمل مشروع لكن فجأة اتجوز وخلف 5 أولاد ورا بعض شوية شوية مساحة الرفاهية بتاعته بتقل جدا لان مرتبه بقي رايح على العيال ومصاريفهم وشوية الموظف بقي يادوب قادر يسد طلباتهم اللي بتزيد مع ثبات مرتبه.
عدد السكان الكبير بيدخلنا لمشكلة الدولار وفاتورة الاستيراد اللي عدت الـ100 مليار دولار في وقت الشدة ونقص العملة، لأن الدولة مطالبة بتوفير احتياجات المواطنين واللي بيزيدوا بشكل أسرع من معدلات التنمية وعشان كده الخير مش بيظهر على المصريين وعمرهم ماهيغتنوا غير لو ضاعفت الدولة من معدلات النمو الاقتصادي وبقت دولة مصدرة وقللت معدلات المواليد ووطنت الصناعة وضاعفت الاستثمارات والاستمرار في بناء مجتمعات جديدة لاصلاح عيوب التوزيع السكاني.
طيب هترجع تقولي عدد السكان مش أزمة في الثراء وبدليل الصين واليابان عندهم شعوب زي النمل.. هقول لحضرتك فعلا بس قبل الصين ماتبقى كده كانت دولة فقيرة من العالم التالت واشتغلت على نفسها في التصنيع والتقليد ومنتجاتها غزت العالم واليابان طلعت مدمرة بعد الحرب العالمية لكن عرفت الطريق صح واشتغلت على نفسها في الصناعة والجودة والتصدير واليابان على عكس ناس كتير فاهمة غلط هي مابدأتش من الصفر ودلوقتي لازم مصر تاخد بالأسباب وهي فعلا بدأت تمشي في الطريق الصح والمشروعات والأرقام بتنصف الحكومة الحالية.
