العرب يتحررون من هيمنة الدولار وتحرك عاجل من السعودية.. أسرار تنشر لأول مرة

 
يا ترى إيه موضوع العملة العربية الموحدة الي بدأنا نسمع عنه كتير الفترة الأخيرة؟ وهل ممكن موضوع زي ده يحصل فعلا ؟و إيه فوايد وجود عملة موحدة لمجموعة دول؟ وإزاي أصلًا ممكن نعمل عُملة موحدة؟ والسؤال الأهم مين الدول المهتمة بوجود عملة عربية موحدة؟ ويا ترى مستقبل العملة دي هيكون إيه؟
 
فيه عالم جديد بيتشكل في آخر كام سنة.. وفيه قوى اقتصادية كبيرة هتختفي قُريب.. وقوى جديدة هتظهر وتتصدر العالم.. ومن بعد الحرب الروسية الأوكرانية وفيه معركة تكسير عظام حرفيا بتحصل في كواليس عالم الاقتصاد.. وفيه حرب طاحنة أشعلتها الولايات المتحدة الأمريكية في سوق العملات لما استخدمت الدولار كسلاح في مواجهتها مع الروس.. وكلنا شفنا وتابعنا ازاى أمريكا استخدمت حلفائها في اوربا لخنق موسكو من خلال تجميد أرصدة بمليارات الدولارات للبنوك الروسية وكمان إزالة روسيا من نظام سويفت للمدفوعات الدولية ومن يومها وكل دول العالم بدأت تاخد بالها انها ممكن في لحظة تلاقي نفسها تحت رحمة الأمريكان وده لأن معظم الدول معاملاتها التجارية ومكونات الاحتياطي بتاعتها معتمدة بشكل أساسي ورئيسي على العملة الأمريكية.. ومن هنا بدأت تحصل تحركات للتحرر من هيمنة الدولار
طب ايه اللى حصل؟
بص يا سيدي روسيا والصين ومعاهم دول كبيرة ومهمة زي الهند والبرازيل وجنوب افريقيا بدأوا يدرسوا استحداث عملة عالمية بديلة للدولار وده بيتم من خلال تجمع البريكس اللى بيكبر وبينمو يوم بعد التانى وبتطلب دول كتير الانضمام ليه ومن بينهم مصر وعدة دول عربية كبيرة زي السعودية والامارات وغيرهم..  والأمريكان نفسهم قلقانين جدا من التحركات اللى بتتم في الاطار ده وبيحاولوا بكل الطرق افساد المخطط اللى بتقوده روسيا والصين للتخلي عن العملة الأمريكية 
وفى محاولة منها للابتعاد عن سيطرة أمريكا أعلنت أكتر من دولة عن اتفاقيات مشتركة لتبادل العملات ومن خلال الاتفاقيات دي بيتم التعامل بين دولتين بالعملة المحلية في البلدين في التعاملات التجارية بدلا من الدولار اللى بقالوا سنين مسيطر ومستحوذ على التعاملات الدولية في سوق السلع.
ولسه من كام يوم دولة الامارات العربية الشقيقة أعلنت عن اتفاقية مبادلة عملة مع الهند وبموجب الاتفاقية دي كل المعاملات بين أبوظبي ونيودلهي هيتم بالدرهم والروبية ومش هيكون فيه أي احتياج للدولار
حد هيسأل ويقول إيه علاقة ده بالعملة العربية الموحدة اللى اتكلمنا عليها في أول الفيديو؟
العرب قوة اقتصادية كبيرة ولا يستهان بيها وفيه أكتر من دولة عربية تاثيرهم في سوق مهم زي سوق النفط لا يمكن اغفاله والأكتر ان ددولة زي السعودية مثلا بتلعب دور مهم جدا في استمرار قوة الدولار ولو طلعت الصبح قالت انها مش هتبيع المواد البترولية بنظام البترودولار اللى بيربط أسعار النفط بالعملة الأمريكية هيحصل انهيار في الدولار 
ولأننا في عالم جديد كل دولة في بتدور على مصالحها فيه تحركات بتحصل في الكواليس عشان يتم تدشين عملة عربية موحدة والمملكة العربية السعودية هي اللى بتقود التحركات دي وبتعقد اجتماعات على أعلى مستوى في أكتر من دولة لاقرار العملة الجديدة.
ووفقا لمعلومات بانكير في البداية هيتم التعامل بالعملة العربية الموحدة في البداية في عدد محدد من الدول العربية وبعد كده هيتم تعميم العملة الجديدة في كل التعاملات التجارية بين الدول العربية ووقتها مثلا مصر لو محتاجه بترول من السعودية هتشترى وتدفع باعلمة العربية الموحدة مش بالدولار والسعودية لو هتشترى سلع غذائية من مصر هتدفع بالعملة الجديدة وده هيكون ليه مردود اقتصادي كبير على اقتصاديات الدول العربية، وهيساهم في زيادة التعاملات التجارية بين مختلف دول الوطن العربي. 
وبالمناسبة فكرة تدششين عملة عربية موحدة مش قترح جديد ولا حاجة بتحصل لأول مرة الموضوع قديم وطول الوقت كان بيتم الكلام عن الموضوع ومن حوالى 10 سنين به اتحاد المصدرين والمستوردين العرب أتقدم بمقترح لجامعة الدول العربية لإطلاق عمله عربية موحدةبهدف تحقيق اتحاد عربي اقتصادي ومالي.
ومن كام يوم أعلن رجل الأعمال الاماراتى خلف الحبتور دعمه لتدشين عملة خليجية موحدة تشارك فيها مصر والأردن واتلكم عن الفوايد الاقتصادية الكبيرة اللى هتعود على الدول المشاركة في المشروع.
وخلونا نقول لحضراتكم ان حلم تدشين عملة عربية موحدة ممكن يتحقق لو صدقت النوايا ولو كل دولة من الدول العربية أدركت حجم الخير اللى ممكن يعم عليها وعلى غيرها من أشقائها لو نجحنا اننا نعلم العملة دي ولينا في اليورو عملة اوربا الموحدة خير مثال .. واليورو حاليا العملة الموحدة في 20 دولة من اصل 27 دولة أعضاء في الاتحاد أوروبي ونقل المعاملات التجاري بين دول الاتحاد الأوربي نقلة تانية خالص.