صراع المليارات الصينية والهندية واليابانية في قناة السويس

كل يوم تقريبا في بانكير بنتكلم عن استثمار جديد في مصر بكافة المجالات، بسبب الحوافز السخية اللي بتقدمها الدولة المصرية للمستثمرين واللي بسببها دخلت مليارات الدولارات في الشهور الأخيرة بتعاقدات لعمل مشروعات جديدة، والحقيقة الاستثمارات اللي دخلت مصر كانت من دول كتيرة عربية خاصة الخليج وأوروبية وخاصة ألمانيا وإسبانيا وأسيوية وأهمها الصين والهند واليابان.. وخلينا في الدول التلاتة الأخيرة، لانه فيه خناقة كبيرة بينهم على الاستثمار في مصر وفيه صراع شرس محدش خد باله منه رغم إن فيه تقارير دولية اتكلمت عنه بالتفاصيل.. ليه اليابان والصين والهند بيتنافسوا على التواجد والاستثمار في المنطقة الاقتصادية بقناة السويس.
 

الاستثمارات في قناة السويس 

رغم إننا اتكلمنا عن الاستثمارات الهندية والصينية واليابانية الجديدة في مصر ودا أمر طبيعي لأنها بلدنا وبنغطي أخر الأخبار فيها لكن فيه جهات دولية متابعة الموضوع بردوا وقالت إن الشركات اليابانية والهندية والصينية والشرق أوسطية كلها بتتنافس للحصول على فرص استثمارية بالقرب من قناة السويس المصرية، وإن التنافس بين العمالقة التلاتة مش عشان مصر بس .. لأ دا عشان الدخول لأفريقيا من البوابة الشرعية واللي هي مصر.

الاستثمارات الصينية في قناة السويس 

ورصدت التقارير اتجاه عدد متزايد من المستثمرين الصينيين لمصر بحثاً عن طريق مختصر للأسواق الدولية بفضل قناة السويس والحوافز الضريبية السخية اللي بتمنحها الحكومة، بجانب موقعها عند تقاطع آسيا وإفريقيا وأوروبا. ودا معناه ميزة كبيرة للشركات الصينية وبلاد التنين وطبعا منافسين الصين التقليديين وهما الهند واليابان مش هيبسبوا الصين تفوز بالموقع الفريد لوحديها وبدأو يتحركوا.

هجوم هندي في الاستثمار في مصر

وقد تحدثنا من قبل في موضوع الشركات الهندية وقلنا إنه فيه هجوم هندي في الاستثمار في مصر ورصدنا الحجم المهول للمشروعات الهندية في مصر واللي جت مع توقيع شركات صينية لمشروعات ضخمة في مصر خاصة في مجال الطاقة النظيفة بعد مؤتمر قمة المناخ بتاعة شرم الشيخ وحصل زي تنافس بين شركات الدولتين على إقامة المشروعات في منطقة قناة السويس والعين السخنة تحديدا.
الجميل في الصراع الأسيوي على الاستثمار في مصر إنه دخل مرحلة الجد وشركات هندية وصينية ويابانية اشتغلوا بالفعل في عمل مصانع في مجالات الأسمدة والهيدروجين الأخضر وصناعة البلاستيك ومستحضرات التجميل وكلها مشروعات اتكلمنا عليها بالتفصيل وكان أهمها مشروع الـ8 مليار دولار لشركات صينية في المنطقة الاقتصادية لقناة السويس وتخصيص مدينة كاملة للصين بالمنطقة للتنمية الاقتصادية والتكنولوجية اسمها (تيدا) واللي جذبت مئات الشركات، معظمها صينية.

فرص اليابان بمصر

كمان قال التقرير إن الشركات اليابانية بدور على فرص مماثلة لفرص الصين بمصر وإنه رئيس الوزراء الياباني فوميو كيشيدا  لما زار مصر أواخر أبريل، وعد بأن الشركات اليابانية هتستثمر في المنطقة.

وقال خبير الاقتصادي والبارز في معهد الشرق الأوسط بواشنطن، الدكتور جون كالابريس، إنه لم يفاجأ بدخول اليابانيين اللعبة لأنهم سعوا خلال العام الماضي أو أكتر إلى تعزيز الاستثمار والعلاقات الأخرى مع المملكة العربية السعودية والإمارات العربية المتحدة ومصر لأنه اليابانيين متأكدين إن مصر هي بوابة لأفريقيا، وده نفس اللي شايفاه الصين.