هل ترفض مصر مطالب صندوق النقد الدولي ؟
مصر لحد دلوقتي نفذت معظم شروط صندوق النقد الدولي.. ورغم كده لسه مسئولي الصندوق بيماطلوا ومش عاوزين ييجوا يعملوا المراجعة الخاصة بصرف الشريحة التانية من قرض ال 3 مليار اللى مصر اتفقت عليه مع الصندوق في شهر أكتوبر اللى فات.. وكمان فيه تسريبات من أكتر من مؤسسة تمويل ان الصندوق لسه بيحاول يفرض شروط جديدة ومصمم ما يعملش اى حاجة غير لما الحكومة تعمل تخفيض جديد للجنيه المصري رغم ان رئيس الحكومة طلع بنفسه وأكد ان الجنيه مقيم بأقل من سعره بكتير..وعشان كده في الفيديو ده هنقول لحضراتكم على تفاصيل يمكن بيتم الكشف عنها لأول مرة.. تفاصيل هتقلب الموازين وهتغير قواعد اللعبة تماما.. وهتخلى مصر لأول مرة من سنين طويلة تتحرر من هيمنة صندوق النقد.. فيا ترى إيه اللي بيحصل في الكواليس ومصر هتتصرف إزاي؟
صندوق النقد الدولي
للأسف صندوق النقد الدولي بيمارس ضغوط كبيرة جدا على مصر وراسه والف سيفف اما تخفيض قيمة الجنيه مرة جديدة واما مفيش فلوس هتيجي مصر لا دلوقتى ولا يعدين.. يعنى تقدر تقول كده ان مسئولي الصندوق بيلووا دراع مصر وبيقولوا للحكومة بكل بجاحة يا اما تنفذوا مطالبنا حتى لو ده هيدمر البلد ويخرب الاقتصاد يا اما خلاص بح مش هنديكم قروض تانية.. وعشان كده وده الجديد اللى جايبينوا لحضراتكم النهاردة من الكواليس بقا فيه تفكير جدي وقوى ان مصر ما تكملش اتفاقها مع صندوق النقد .. أيوه زي ما حضرتك سمعت بالظبط.. مصر بنسبة كبيرة أقرب الا انها تستغنى عن برنامج التمويل اللى اتفقت عليه مع الصندوق لأن الخساير اللى هتترتب على اكمال البرنامج هتكون أكبر بمراحل عن أي مكسب ممكن يتحقق.. ده غير فكرة الوصاية اللى بيحاول مسئولي الصندوق يمارسوها على مصر.
ووفقا لمصادر بانكير فبنسبة كبيرة لو الصندوق أصر على شروطه الحكومة هتبلغ المسئولين هناك برفض الشروط دي والاستغناء بشكل نهائي عن القرض المنتظر.. وحاليا فيه مفاوضات شغالة ومصر أعلنت بكل وضوح انها حاليا مش هتعمل اى تخفيض في قيمة العملة .. لكن معندهاش اى مشكلة في تنفيذ باقي الشروط اللى بالفعل نفذت معظمها.
طب مصر بتفكر إزاي في الملف ده ؟
بص يا سيدي الحكومة من بدري وهي شغالة على تعظيم الموارد الدولارية وعندها أكتر من حاجة شغالة عليها في الاتجاه ده أولها طبعا خطر الطروحات الحكومية لعدد من الشركات المملوكة للدولة في البورصة وده مشروع ضخم مصر ممكن تجنى من وراه وفقا للأرقام الرسمية المعلنة حوالى 40 مليار دولار على 4 سنين يعنى بمتوسط 10 مليار دولار كل سنة وفعلا تم الإعلان عن طرح أكتر من 30 شركة كمرحلة أولى في الاتجاه ده ولغاية نهاية 2023 متوقع مصر تجمع 2 مليار دولار من بيع بعض الشركات وهتستكمل الخطة في السنين الجاية.
مصر كمان بدأت تظبط أمورها مع الأشقاء في الخليج وكل المشاكل والتحديات اللى كانت موجودة وبيشتكي منها المستثمرين العرب تم حل معظمها والرئيس السيسي بنفسه تدخل وأصدر أكتر من قرار من خلال المجلس الأعلى للاستثمار لتشجيع روؤس الأموال وصناديق الاستثمار العربية على استثمار فلوسهم في مصر وبدأنا نسمع عن مشروعات بمليارات الدولارات هتتتنفذ خلال المرحلة الجاية ومنها مشروعات انتاج الطاقة الكهربائية مع الامارات واللى هيتم ضخ 11 مليار دولار من خلاله في مصر بالإضافة كمان لمشروعات ضخمة مع السعودية وقطر هيتم الاعن عنها تباعا والمشروعات دي هتدخل للبلد عملة صعبة وهتوفر فرص عمل جديدة.
مش بس كده عوايد قناة السويس هتتضاعف ومعاها الصادرات النفطية وغير النفطية وفيه خطة بالوصول بحجم صادرات 100 مليار دولار في السنة ومعاه بالتوازي خطة لتخفيض الاستيراد وتخفيف الضغط على الاحتياطي النقدي من العملة الأجنبية مع كمان توطين لعدد كبير من الصناعات
طب يعني مصر لو تراجعت عن اتفاقها مع صندوق النقد ده مش هيضرنا في حاجة يعنى الصندوق هيسيبنا في حالنا؟
الصندوق جهة تمويل واقراض وما يقدرش يعمل معاك حاجة كل اللى هيحصل ان مصر هترجع الشريحة الأولى اللى خدتها من الصندوق واللى بتبلغ حوالى 340 مليون دولار ودول سهل تدبيرهم من اى مشروع من المشروعات اللى هتتعمل كمان مصر ملتزمة بسداد التزماتها الخارجية واى ديون قديمة او فوايد بتتسدد في وقتها ومفيش أي تأخير بيحصل .
يعنى فعلا مصر تقدر تتحر من هيمنة الصندوق؟
طبعا ممكن جدا بس ده محتاج شغل كتير ومحتاج صبر من الناس على برنامج الإصلاح اللى بتنفذه الحكومة ومحتاج شغل أكتر على مناخ الاستثمار في مصر وعلى جذب روؤس أموال أجنبية لأن باختصار ومن الآخر مشاكل مصر عمرها ما هتتحل بالقروض والسلف والاستثمار المباشر والإنتاج هو اللى ممكن يغير كل حاجة وممكن يحول بلد من الاعتماد على القروض الخارية لبلد بتحقق فائض كبير في ميزانياتها
طب كده مفيش تعويم تانى؟
الكلام اللى قاله رئيس الحكومة من كام يوم عن القيمة الحقيقية للجنيه بيقول ان مفيش اى تفكير في تخفيض قيمة العملة من جديد لأن بالعقل والمنطق كده ازاى عملة الحكومة شايفة انها مقيمة بأقل من سعرها ممكن تخفض السعر بتاعها أكتر .. مش بس كده الحاجات اللى بتتعمل عشان تزود السيولة الدولارية هتخلى سعر الدولار ينخفض قدام الجنيه وده هيزيد من قوة العملة المصرية .. وهيخلى مصر بتتفاوض مع صندوق النقد بمنطق قوة وتقدر ترفض الشروط اللى مش عجباها
