عملاق ألماني يتحرك لمصر.. استثمارات هتقلب الموازين
توطين الصناعة من أهم الملفات في حكومة مدبولي واهتمامات القيادة السياسية باعتبارها وسيلة مهمة لتخفيف حدة الاستيراد وعدم استنزاف الدولار في السوق ولما يكون فيه صناعة متنوعة وكثيفة هتعمل ارتداد عكسي للدولار يعني بدل حالة النقص هيكون متوفر وبزيادة ودا كله في صالح الجنيه، وفي الكام شهر الأخيرة شفنا مصانع وشركات عالمية في الصناعة بتستثمر في مصر سواء في المنطقة الاقتصادية في قناة السويس وبورسعيد والمناطق التانية وكلها صناعات كبيرة واستراتيجية زي صناعة السيارات وإطارات السيارات والغزل والنسيج والتعدين والثروات الطبيعية والأجهزة المنزلية، وبمناسة الأجهزة المنزلية حصلت حاجة مهمة النهاردة هتحول مصر لمركز صناعي كبير وبمواصفات ألمانية عالية الجودة.. تعالو نشوف القصة إيه
مجموعة BSH أو بوش للأجهزة المنزلية، معروفة في العالم كله إنها فخر الصناعات المنزلية الألمانية وماركة مسجلة زي ما بيقول المصريين، الشركة الأوروبية دي والمتخصصة في تصنيع الأجهزة المنزلية، ليها استثمارات كتيرة في مصر وعشان كده حصلت على الرخصة الدهبية للاستثمار، من إجمالي 15 رخصة ممنوحة بس لكبار المستثمرين الأجانب والجادين على مختلف مستويات وقطاعات الاقتصاد المصري.
حسام هيبة، الرئيس التنفيذي للهيئة العامة للاستثمار والمناطق الحرة، سلم الرخصة الدهبية لـ لويس ألفاريز، الرئيس التنفيذي لشركة “بي إس إتش إيجيبت” للأجهزة المنزلية، المالكة للعلامة التجارية Bosch لإنشاء مصنع بوتاجازات، ولغاية هنا الكلام جميل لكن الأجمل في الموضوع إن المشروع الجديد باستثمارات ضخمة وبأحدث تكنولوجيا في العالم وهيوفر فرص عمالة لناس كتير.
ليه بوش خدت الرخصة الدهبية.. عشان حاجات كتير قالها مسءول الصناعة أولها الشركة عندها خطط لتوطين تكنولوجيا صناعة الأجهزة المنزلية في السوق المصرية، والتشغيل الكثيف للعمالة، واستهداف تصدير جزء كبير من المنتجات للأسواق الخارجية وتوفير النقد الأجنبي، ومصر مش عايزة أكتر من كده طبعا.
لويس ألفاريز، الرئيس التنفيذي للشركة الألمانية قال إن الرخصة الطهبية بمثابة شهادة ثقة في استثمارات الشركة بالسوق المصرية واللي بتعتبرها الشركة الألمانية مفتح المنطقة وشمال افريقيا عبر الإنتاج المحلي والتصدير لدول القارة.
مسئول بوش كشف إن الشركة قررت استثمار 50 مليون يورو اضافية في المصنع الجديد لإنتاج بوتاجازت منزلية هي الأولى من نوعها في مصر وفي القارة الإفريقية والشركة ناوية تصدر نص الإنتاج للخارج.
الميزة في ملف الصناعة إنه كله مكاسب سواء كانت استثمارات محلية أو أجنبية ومصر قطعت شوط مهم في توطين كتير من الصناعات في أخر كام سنة.
