هي مصر هتصدر البترول إمتي زي الخليج.. شوف المفاجأة

ناس كتير ماتعرفش إن مصر بتقع بين اكتر منطقتين في العالم فيهم بترول وثروات طبيعية وهي الخليج في الشرق وليبيا في الغرب ولأن طبقات التربة واحدة كل الأراء بتقول إن مصر غنية بالبترول وفي يوم هتتحول لمنتج ضخم زي الخليج والعراق وليبيا.. ياترى مصر بتنتج بترول قد ايه وإيه قصة تصريحات رفع الإنتاج

البترول المصري

مصر بتنتج 587 ألف برميل في اليوم، وعندها خطة لزيادة الطاقة الإنتاجية إلى 650 ألف برميل، لكن للأسف استهلاكها 700 ألف برميل في اليوم يعني يادوب مصر تسد الفجوة في الاستيراد لكن اللي جاي مبشر جدا  بسبب أعمال التنقيب عن البترول والغاز في الأراضي المصرية.

الخبراء شايفين إن تشغيل الحقول الجديدة والتوسعات بحقول قائمة معظمها بمنطقة خليج السويس، زيادة استثمارات الشركاء الأجانب والتوسع في التنقيب هيخلي مصر تعدي من عنق الفقر البترولي، على عكس الغاز واللي قطعت فيه شوت كبير وبقت تصدر.

المركز الإقليمي للطاقة 

ومصر خلاص اتحولت لمركز إقليمي للطاقة من خلال تسييل الغاز وإعادة تصديره ولسه فيه اتفاقية مع حقل افروديت القبرصي واللي قرر يسيل الغاز في محطات الاسالة المصرية وإعادة تصديره، ومصر عشان نبقى عارفين بتنتج ما بين 6.5 و7 مليارات قدم مكعبة من الغاز الطبيعي يومياً.

سوق استهلاكي 

لكن خلينا عارفين بردوا إن مصر سوق استهلاكية كبير في البترول والبنزين والسولا ومصر بتستهلك في السنة  12 مليون طن سولار،  و6.7 مليون طن بنزين، وأي زيادة في إنتاج النفط طبعا هيخفض فاتورة استيراد المنتجات البترولية في وقت احنا في عرض دولار.

الجديد إن مصر حطت خطة طموحة لتحقيق انطلاقة في مجال الاكتشاافات البترولية وبتستهدف زيادة استثمارات شركات النفط الأجنبية إلى 7.7 مليار دولار العام المالي الحالي مقابل 5 مليار بس السنة اللي فاتت… وخلينا نأكد إن لو التوقعات صدقت والأرض طلعت بترول في الاكتشافات الجديدة هيبقي هدية من السما وانطلاقة جديدة للبلد لأننا هنستغله بشكل مضاعف ومش هنصدره خام وعندنا محطات تكرير ضخمة بتحول البترول الخام لمشتقاته من البنزين وغيره وهتقلب المعادلة.