هي ليه مصر مش بتستورد دولار وتحل الأزمة ؟
جايز العنوان يبان غريب عليك لكن فيه ناس فكرت فيه كحل لازمة الدولار، وقالت ليه مصر ماتستوردش الدولار بمعني تستبدله بأي عملة تانية زي اليورو والين وحتى الإسترليني اللي مفهمش مشاكل في مصر وتحوله دولار من أمريكا أو اليابان أو من أي دولة من دول الاتحاد الأوروبي وتبعته مصر، والفكرة بتقم على أساس إن مصر فيها شح دولار لكن في ألمانيا مفيش مثلا ونقدر نستبدله باليور أو أي عملة تانية، خلينا نفكر بالعقل هو دا ممكن يحصل وصعوبة فين.
العملات في العالم كله ليها قوانين بيحميها وينظم تداولها سواء في داخل الدولة أو خارجها، وفيه إدارة مخصوص في الولايات المتحدة وجهاز كبير مهمته حماية الدولار وتعقب خط سيره في العالم كله والنشاطات المخالفة اللي بيمولها الدولار الأمريكي زي الفلوس اللي مع الجماعات الإرهابية والجهاز بيشوف الدولارات دي وصلت إزاي في أيديهم، يعني القصد من الموضوع إن تداول العملة ليه أصول وقواعد.
وتعاملات الدول بتختلف على تعاملات الفرد والأشخاص يعني انت كمواطن أو سائح او مستثمر تقدر تغير عملة وتحولها لبلدك في اطار دايرة استثمارك وبتكون الدايرة دي معروفة ومشروعة لكن مفيش دولة كدولة يعني تروح تشتري عملات من دول تانية وتحولها لدولارات وبعدين تبعتها للبنوك، دا مش منطقي.
طيب الدولارات اللي بره ممكن مصر تدخلها إزاي بشكل شرعي.. الموضوع مش صعب كفاية تكون مستثمر وليك مشروعات أو تجارة في مصر وحساب في الخارج بأي عملة وتحولها لدولارات وتبعتها لحسابك في مصر، وفيه حل تاني ممكن الدولة تجيب بيه دولارات من الأسواق الخارجية وهي إيرادات الشركات الحكومية المصرية اللي شغالة وبتستثمر بره مصر وبتاخد فلوس المشروع بالدولار وهنا تقدر الشركات دي تحول الدولار على البنوك المصرية وفي الاخر هتروح خزنة الدولة، وممكن الحكومة تجيب دولارات مباشرة من الأسواق من أنشطة تانية زي المتاحف المتنقلة للأثار المصرية والمعارض والإعلانات وسبق ومصر نظمت فعاليات ثقافية كتير وجابت حصيلة كويسة من العملة الصعبة.
