الضربة المنتظرة من البنوك لعصابات الدولار.. الفيران هتخش الجحور
لو حضراتكم فاكرين هنا في بانكير .. ومن فترة قريبة.. كشفنا عن ألاعيب جديدة لعصابات الدولار في مصر.. وقولنا ان البنك المركزي ورجالته صاحيين ومراقبين اللى بيحصل وانهم هيتدخلوا في الوقت المناسب للضرب بيد من حديد على كل اللى بتسول ليهم نفسهم التلاعب في سوق الصرف.. وقولنا ان فيه عصابات جديدة بتشتغل على ان مصر ما يدخلهاش دولارات من بره تحديدا من المصريين العاملين في الخارج.. وقولنا ان العصابات دي بتشتغل على المصريين العاملين في الخارج وبتتواصل معاهم وتشتري منهم الدولار بأغلى الأسعار وبتسلم أهاليهم هنا في مصر الفلوس بالمصري وتاخد الدولارات من بره بره.. وفى الساعات الأخيرة حصل كام تحرك هيقضوا على الظاهرة دي بشكل كامل .. فيا ترى ايه اللى حصل؟ وإزاي البنك المركزي بالتعاون مع البنوك المصرية شغالين على الملف ده؟ .. في الفيديو هنقولك كل تفاصيل الملف الخطير ده وهنكشفلك إزاي بيتم التعامل مع واحدة من أهم وأخطر الملفات في القطاع المصرفي
في آخر تقرير للبنك المركزي عن حجم تحويلات المصريين في الخارج كشفت البيانات الرسمية عن عن تراجع التحويلات خلال النصف الأول من العام المالي الجاري بنسبة 23% مقارنة بنفس الفترة من عام 2021-2022
وبحسب تقرير المركزي عن ميزان المدفوعات وصلت تحويلات المصريين بالخارج خلال النصف الأول من عام 2022-2023 إلى 12 مليار دولار مقابل 15.6 مليار دولار في نفس الفترة من العام المالي الماضي.
التقرير ده كان ناقوس خطر لكل الجهات الرقابية في مصر، ومن بعده بدأ التحرك لمواجهة عصابات الدولار اللى بتستولى عليه من المصريين في الخارج وما بدخلش مصر أساسا في وقت البلد محتاجة فيه كل سنت مش دولار، لكن كان فيه صعوبة في مواجهة العصابات دي لأنهم مش تحت ايد الأجهزة في مصر وبيتحركوا بآمان بره فكان لازم يكون فيه تفكير خارج الصندوق لافساد مخططاتهم وإقناع المصريين في الخارج بتحويل الفلوس لمصر وهنا كان لازم تكون فيه حوافز تشجع الناس بره انها تحط فلوسها في القنوات الشرعية بدل ما بتسلمها لكيانات بتحارب البلد.
طب ايه اللى هتعملوا البنوك ؟
بص يا سيدي البنك المركزي شغال كويس جدا في الملف ده ومن خلال التنسيق مع اكبر بنك حكومي في البلد وهو البنك الأهلي هيتم اصدار شهادة إدخار جديدة بالدولار باسم شهادة النيل.. والفائدة بتاعتها هتوصل لـ 10%
ومدة الشهادة الدولارية الجديدة هتكون 3 سنين وهتكون القيمة المخصصة لشرائها هي 1000 دولار أمريكي ومضاعفاته.
والفايدة على شهادة "النيل" الدولارية هتكون دورية بمعدل 9.85% بنظام الشهري، و10% بنظام الربع سنوي.
وحدد البنك الأهلي المصري، عدد من الشروط الخاصة بشهادة "النيل" الدولارية، تضمنت أنه لا يجوز استرداد قيمة الشهادة قبل مضي 6 شهور اعتبارًا من يوم العمل التالي ليوم الشراء، و يمكن الاسترداد بعد المدة دي على أن يتم إعادة احتساب العائد وفقًا لأسعار الاسترداد التالي:
- أكثر من 6 شهور وحتى أقل من سنتين 7%.
- سنتين وحتى أقل من 3 سنوات 8%.
وحدد البنك الأهلي الناس اللى ليها الحق في شراء شهادة النيل الدولارية وهم
الأجانب ، والمصريين اللى عندهم إقامة بالخارج ومتواجدين بمصر، - المصريون المقيمون بالخارج، والمصريين اللى عندهم جنسية تانية (مزدوجي الجنسية) ومتواجدين في مصر
وخلال الأيام الجاية فيه بنوك هتطرح أوعية ادخارية جديدة للمصريين بالخارج وهيكون فيه مزايا غير مسبوقة.
ومن فترة كان البنك التجاري الدولي أتاح 3 منتجات جديدة بالريال السعودي والقطري والدرهم الإماراتي تشمل حسابات جارية- Classic.
وكمان شهادات ادخار جديدة أجل 3 سنين بعائد شهري ثابت، و يمكن للعملاء فتح الحساب وربط الشهادة عن طريق خدمة الإنترنت البنكية أو الخدمة المصرفية عبر الهاتف المحمول.
واختار البنك التجارى الدولى عملات السعودية والامارات وقطر لأنهم أكتر دول فيهم عمالة مصرية
وبيبدأ الحد الأدنى لشراء شهادة الادخار من 5000 ريال سعودي أو قطري أو درهم إماراتي، بسعر فائدة 5.25% سنوي لدورية صرف العائد الشهرية
وبيتيح البنك بيع الشهادة من أول 5 آلاف وحدة من أيٍ من العملات التلاتة (الريال القطري أو السعودي أو الدرهم الإماراتي)، وبيتساوى العائد مع سعر الفائدة على الشهادة الدولارية المطروحة لديه.
وطبعا التحركات دي هيكون ليها دور مهم وفاعل في مواجهة عصابات الدولار في الخارج وهيشجع المصريين انهم يستثمروا فلوسهم ويحققوا من وراها أعلى عائد موجود في السوق.
