منجم فلوس.. إزاي تستثمر وتكسب في البورصة

معاك فلوس وخائف تشغلها في الدهب والعقار عشان تقلبات السوق.. يبقى من غير تفكير حطها في البورصة وهتضمن مكسب غير انك هتبقي من صحاب شركة ايا كان اسمها وحجمها ..
لكن ازاي تشغل فلوسك في البورصة وأنت معندكش خبرة.. شوف الموضوع سهل خالص ومفيهوش مخاطرة زي الناس ما فاكرة .. في الأول لازم تعرف انك ماينفعش تروح بنفسك وتتفرج على أسعار الأسهم وتشتري لأن فيه قواعد للعمل بالبورصة عشان تضمن مكسب كويس وهي انك لازم تتعاقد مع  شركه من شركات الوساطة واللي بتقوم بدور الوسيط بينك وبين الشركة اللي عاوز تشتري أسهم فيها يعني زي مستشار مالي ليك و شركة السمسرة هي اللي بتنفذ عمليات البيع والشراء للعميل مقابل عمولة محددة ومتفق عليها.

ولازم تبقى عارف إن البورصة سوق منظم لبيع وشراء الأوراق المالية زي (الأسهم والسندات ووثائق صناديق المؤشر ووثائق صناديق الاستثمار) وبيتم تحديد سعر الأوراق المالية بناءً على العرض والطلب زي أي سلعة بتتباع في السوق.
وزي ماقلنالك لما تشتري أوراق مالية في اي شركة دا بيخليك شريك مع الحكومة والقطاع الخاص في مختلف القطاعات الاقتصادية.
وكل  ما الشركة أدائها بيتحسن مكسبك بيزيد يعني مثلا لو انت اشتريت 100 سهم في شركة ألبان وفي آخر السنة أرباحها زادت انت مكسبك في السهم بيزيد وهكذا وهنا بيجي دور شركة الوساطة اللي بتختارلك أفضل الشركات للاستثمار فيها ولأن الشركات المقيدة في البورصة شركات ضخمة فالمكسب مضمون.