بعد قفزة الدولار في السوق السوداء.. إيه اللي هيحصل بسوق الدهب
طبعا أسواق صرف العملة والدهب بتعيش حالة من عدم اليقين والثبات بسبب التقارير اللي كل يوم تطلع عن مستقبل الجنيه المصري واخرها تقرير من بنك عالمي وهو ستاندرد تشارترد البريطاني واللي طلع حذر من مخاطر تمويلية مصر ممكن تتعرض ليها الفترة الجاية، ودا اتسبب في عودة الروح للسوق السودا للدولار بعد أيام طويلة من التراجع الشديد في أسعار العملة الأمريكية.. ياترى في حالة الفوضى دي سوق الدهب رايح علي فين وهل ممكن ترجع الأسعار الفلكية للدهب.
الذهب في مصر
في مصر ثقافة شعبية بتقول إن أي خطر حوالين الجنيه الناس تجري على الدهب تشتري وتخزن سواء مشغولات أو سبايك وجنيهات دهب عشان تحفظ قيمة فلوسها من أي تخفيض في قيمة الجنيه وطالما مفيش شهادات ادخارية بعوايد كبيرة فبيبقى الدهب هو الملاذ الآمن.
واللي متابع لسوق الدهب الفترة اللي عدت فهيعرف إن الإسعار في النازل وبشدة لكن تقرير ز يبتاع ستاندرد تشارترد ، ممكن يقلب الدنيا لأن الدولار لو زاد في السوق السوداء دا معناه ضغط كبير على الجنيه واحتمال البنك المركزي يدخل عشان يسد الفجوة بين السوق الرسمي والموازية ودا ممكن يكون عن طريق تعويم جديد لابد منه.
ودا معناه بردوا إن الناس هتتوجه لمحلات الصاغة عشان تشتري دهب وتشيله للزمن بعيد عن البنوك وبكده الأسعار بتاعة الدهب أكيد هتزيد بشكل كبير نتيجة ارتفاع الطلب المتوقع على سوق الدهب، والدولة مش قدامها غير حل واحد عشان تلحق تسيطر على السوق قبل ما يفلت تاني وهي إنها تزود بأي شكل من الأشكال المعروض من الدهب عن طريق إعفاءات جديدة أو حتى تستورده بنفسها وضخه في السوق لأنه لو حصل وزاد الطلب على الدهب وقل المعروض الأمور هتخرج عن السيطرة.
السيطرة على السوق السوداء
وفي سيناريو تاني إن الحكومة تنجح في إعادة السيطرة على السوق السودا للدولار وبالتالي نزول سعره وبكده مش هيبقى فيه أي خطر على سوق وأسعار الدهب.
