تقرير خطير عن الدولار في مصر.. وقرار متوقع من صندوق النقد

معروف إن مصر فيها ازمة دولار زي دول كتير عندها أزمات، لكن في نفس الوقت الأزمة مش خطيرة للدرجة اللي تخوف أو تسبب انهيار اقتصادي لأن مصر فيها موارد دولار كتير ومتنوعة والمشكلة كلها في عامل الزمن اللي ماشي عكس خطوات مصر لتوفير العملة الصعبة وفي وقت فيه ضغوط كتير على الدولة المصرية.. ايه أخر تطورات أزمة الدولار وايه التقرير الخطير اللي اتقال عن مصر

تقرير بنك ستاندرد تشارترد

البنك البريطاني الكبير ستاندرد تشارترد،  طلع تقرير عن مصر وقال إنها بتواجه مخاطر تمويل إضافية في الفترة الجاية، من بينها حجم المدفوعات الكبيرة المطلوب سدادها لصندوق النقد الدولي، وكمان موعد استحقاق السندات الخارجية، ودا شي بيقلق المستثمرين ووكالات التصنيف الائتمانية.

لكن البنك الشهير قال كلام تاني مهم وهو إن مفتاح التعافي لمصر، بيبدأ من تعزيز تدفقات العملات الأجنبية غير المرتبطة بالديون، وإن مصر قدامها فرصة سريعة للخروج من عنق الزجاجة وهي تسريع وتيرة بيع الأصول المملوكة للدولة، ودا مش عشان توفير التمويل الخارجي وإبطاء استنزاف احتياطيات العملات الأجنبية بس،دا كمان لإقناع صندوق النقد بالالتزام بالإصلاحات وصرف الشريحة التانية من القرض.

تفاؤل بحل الأزمات 

البنك العالمي فال إنه رغم الصعاب هو متفائل بقدرة مصر على حل الأزمات وقال إنخ هيحصل تقدم في ملف مبيعات الأصول ومتطلبات صندوق النقد خلال الكام شهر اللي جايين وكمان المجلس التنفيذي للصندوق هيوافق على المراجعة الأولى بالربع التالت من 2023 لان مصر لسه واقفة على أرضية ثابتة وموارد الدولار كلها فيها نمو كبير متوقع خاصة من قناة السويس والاستثمار المباشر والتصدير وغيرها من الموارد.
ورغم استبعاد تعويم الجنيه في الوقت الحالي لكن  ستاندرد تشارترد شايف إن القرار اللي هو التعويم هيكون ليه فوايد كبيرة للاقتصاد المصري لأنها هتساهم في جذب تدفقات الاستثمار الأجنبي المباشر خاصة من دول مجلس التعاون الخليجي واللي قرر تحويل الدعم من منح وودايع لاستثمار مباشر وتعاون تجاري.

صندوق النقد الدولي 

كلام البنك البريطاني وهو مش مجرد بنك دا مؤسسة مالية وامبراطورية متشعبة وتقاريره معترف بيها، قال حاجات كويسة بين السطور وهي إن صندوق النقد الدولي هيوافق على صرف باقي القرض ودا معناه إن مصر دولة قوية اقتصاديا، ومعناه كمان إن مفيش إجراءات قوية ممكن تزعل المواطن العادي، وفي نفس الوقت سلط البنك البريطاني الضوء على آفاق الاستثمار الأجنبي والعربي في مصر واللي بيحقق طفرة كبيرة في كل المجالات.