لو هتشتري أو تبيع.. أعرف توقعات اسعار الذهب في الفترة المقبلة
اللي بيحصل في سوق الدهب في مصر خارج كل قواعد السوق واوعى تصدق حكاية العرض والطلب اللى بيقول عليها بتوع الصاغة وأصحاب محلات الدهب لأن الدهب عالميا بيتراجع بشكل ملحوظ وأسعار المعدن النفيس بتنزل كل شوية عالميا في الوقت الى بتزيد فيه في السوق المحلى من غير سبب واضح.. فيا ترى ايه اللى بيحصل وهل السعار الفترة الجاية هتزيد ولا هتقل؟
توقعات اسعار الذهب
بسبب اللى بيحصل في أمريكا ومع وجود إشارات قوية على اقتراب حل أزمة رفع سقف الدين في الولايات المتحدة سعر الدهب عالميا بدا يحصل فيه تراجع ملحوظ وسجل سعر الاونصة في اخر تعاملات مستويات تقترب من 1950 دولار بعد ما كان وصل لحوالي 2080 دولار لكنه فشل في كسر نقطة المقاومة دي وبدا المؤشر في الهبوط مع ارتفاع ملحوظ في مؤشر الدولار.
طب ايه اللى حصل في مصر؟
في مصر ومع اعلان الحكومة سماح للمصريين في الخارج بدخول كميات من الدهب من غير جمارك ولا رسوم السوق هدي والأسعار حصل فيها انهيار كبير جدا وهبط سعر جرام 21 من 2850 الى مستويات 2200 جنيه يعنى 650 جنيه تراجع في سعر الجرام الواحد وكان متوقع نزول تانى أكتر من كده لكن فجأة ومن غير مقدمات وبعد اغلاق سوق الدهب وفى أيام الاجازة الجمعة والسبت الى فاتوا التجار استغلوا الموقف ورفعوا الأسعار مرة تانية لغاية ما الجرام عدا الـ 2500 جنيه لكن مرة تانى تراجعت الأسعار لغاية ما وصلنا النهاردة 2375 جنيه للجرام يعنى لو حسبتها حسبة بسيطة على السعر العالمي هتكتشف ان بتوع الصاغة مسعرين الدولار على اكتر من 44 جنيه وده أعلى من سعر الدولار في السوق السودا بكتير .
طب ايه اللى هيحصل الأيام الجاية وهل الأسعار نازلة ولا طالعة؟
المفروض الأيام الجاية السعار تنزل عن السعر الموجود حاليا لأن الدهب عالميا متوقع يهبط لحدود 1800 دولار للأوقية في حال التوصل لحل لأزمة الديون الأمريكية كمان المفروض الأيام الجاية هتبدأ كميات كبيرة من الدهب تدخل مصر مع المصريين الجايين من بره ولازم نكون عارفين انه لغاية دلوقتى على ارض الواقع لسه مفيش دهب دخل من بره.
كمان السوق السودا للدولار بتشهد تراجع كبير في سعر العملة المريكية وده طبعا هيكون ليه تأثير على سعر الدهب، والاتجاه المفروض يكون هبوطي .
طب ليه بنقول المفروض؟
لأن زي ما قولنا لحضراتكم في اول الفيديو اللى بيحصل في سوق الدهب أصلا مش طبيعي وصعب جدا تخضعه لعمليات العقل والمنطق وقواعد السوق.
