حلول الحكومة لتوفير الدولار
طرق كتير ماشية فيها الحكومة دلوقتي علشان توفر مخزون أكبر من العملة الصعبة.. وعملة صعبة يعني دولار ويورو وعملات تانية.
والحكومة معنية بالدرجة الأولى بأنها تزود من مخزون العملة الصعبة.. ودا لأن مصر لو سابت الجنيه في مواجهة مباشرة مع الدولار من غير توافر للعملة الأمريكية دا هيهز الجنيه بشكل غير مسبوق وهيخلي سعر صرفه في الأرض طالما الموضوع عرض وطلب ومعنى كده الجنيه هيفقد قيمته الشرائية والأسعار هتزيد اكتر.
وعلشان الحكومة تحل مشكلة السيولة فهي بتجري في اكتر من مسار
وأولهم استهداف الحكومة إبرام صفقات بقيمة ملياري دولار بنهاية يونيو عبر بيع أصول حكومية للسعودية وقطر والإمارات.. ودا من خلال برنامج الطروحات اللي أعلنت عنها الحكومة واللي بيشمل ٣٢ شركة.
وتاني حل هو تقديم وديعة خليجية في البنك المركزي للمساعدة في إدارة أي تعديل مستقبلي لقيمة العملة.. ودا اللي رجحته المجموعة البنكية الفرنسية بي إن بي باريبا.. اللي بيقع مقرها الرئيس في باريس، ولديها مقر عالمي آخر في لندن.
وتالت حل هو زيادة الصادرات الزراعية والصناعية.. والعمل على جذب استثمارات من الخارج ودا اللي بتأكد عليه القيادة السياسية طول الوقت.
